97回歸時，志光18歲剛投身社會，跟家人住石塘咀再發大廈，當時月入$8000，人生滿希望，夜晚食下波記入下火井，行下創業去下華爾登買光酥餅，去下尼斯花園買六合彩。
2003年沙士比老闆呃左共渡時艱又變回月入$9000 ，當時已經同家人搬到山市街，難捱但仍有機會，仲可以食下發記、珠記、津津，卓記、可可……閒來可以走到高逸華軒對出海旁釣下魚，未有泓都的堅尼地城，無乜大陸人，無酒吧，無乜鬼佬！
2014年，志光好努力下月入13000，仍然係梁特首眼中的貧民，公屋無資格排隊，私樓應該一世無望，但仍然得上天眷顧，遇上了思琪，一位女孩，同樣係梁特眼中的貧民，但兩情相悅。
志光已經無同家人同住，西環一間套房亦已經$7500起跳，志光搬到西營盤一個套房，佢無乜特別喜好亦無乜多餘錢去搵嗜好，慶幸思琪並非睇錢至上嘅港女，唔需要餐餐打咭，無牌子唔著得，兩口子過得甜蜜。況且，西營盤仍然有些特色小店，每個月還可以去一兩次，去第三街買下齒留香買隻法國春雞，高街食下串燒拉麵，二街食下班戟，懷舊就落森美鋸扒或者聯華兩份食個焗豬扒飯，通常都送個羅宋湯飲下，有時一齊上網睇下戲，當然早d 有得睇HKTV就好。兩口子生活上其實只是剛剛好，只好扮下偽中產自得其樂。
9月尾，兩口子睇緊新聞直播，大家有一定改變，試過做外國勢力送物資落佔領區，試過看著電視畫面忽然有沙入眼，兩個人擁著無言看Youtube ，大家甚少講及將來，但知道過往自己熟悉的香港已經不一樣。
桃花依舊，人面全非，大道西仍然掛著民建聯banner支持警方執法，還路於民。當然不少西環人仲以為地鐵係民建聯成功爭取番黎。
今日志光帶著思琪從行人電梯由正街上到般咸道，再往中環方向走，去到新藍塘食左個茶餐，再經行人電梯上到羅便臣道，西半山已經變成中產以至有錢人先應該出現或者居住嘅地方。當經過一間舖頭，思琪被門口兩部 50cc 電單車吸引著，同時間志光笑笑口話要入內配匙，ok！配條匙又唔會洗好多錢！
點知志光一入去就坐到配匙機前，抽出自己鎖匙在配匙。 思琪好奇地問志光：乜你識配匙？乜你識呢度老闆？ 志光無答，自顧自地配匙，拿著新匙交到思琪手上！ 跟著說。
經過呢60幾日，政府半步不讓，我短期內都睇唔到有乜野新希望，我亦都無能力係西半山買樓或者住上黎呢區，但係我絕對好想同你一齊生活，雖然我住緊套房，我都希望可以親手將鎖匙交到妳手上，我暫時無能力為妳打造一個屋企，但起碼親手打造一條鎖匙比妳，希望妳會鐘意呢份聖誕禮物！
思琪眼框有點濕：你好cheap！不過我鐘意！呢條匙我真心願意袋住先！
以上內容，如有雷同，實屬巧合。謹以此文送給所有西環友及店舖，與及新開店的朋友。