位處堅彌地城海旁，望著堅尼地城泳池，隨著今日地鐵開通，西環街道上忽然人流多左，好多借地鐵之便「重遊」或「暢遊」西環，空氣中都彷忽有陣「堅離地」氣味，好多人期望西環變成另一個蘇豪區，但亦有好多街坊擔心變天後小店老店滅絕，西環帶著或帶俾大家西友無數回憶印記，唔知道有幾多可以保留下來？當然亦有部份街坊鬧我等阻住地球轉，「經濟發展就是硬道理」、「乜都以前好唔洗x老母」。
西環人近年有部份意識到地產霸權對西環影響深遠，舊樓舊店變成豪宅連鎖店，人情味越來越啖，細個係西環由西營盤走到落堅尼地城，每個地點各有氣味，茶樓、食店、車房、藥房、泳池、屠房、茶行、甚至連公廁都有陣味會傳出黎，細個唔明白，有喜歡亦有討厭。
細個唔明白人情味係乜野味？亦唔明白銅臭味係乜野味？ 隨著地鐵開通，今日對比之下就明白兩種味特別之處。西環要發展，但唔需要十幾間酒店，唔需要迫走小商戶，唔需要領匯式大商場，唔需要酒店式大堂豪宅，唔需要大陸式足浴/浴足，唔需要大量自由行。西環可能貼近大學及名校區，西環人素養從來不失禮人，未開通地鐵前，西環人對排隊或使用交通工具有良好文化，最擔心是地鐵開通後，大家都會習以為常地鐵中的冷漠自私文化（如果你每日都迫地鐵番工放工就知道），由不忿到無奈接受再到認同，不過反過來說，亦好讓西環人明白當高官話上唔到車就等多兩班是何等涼薄。
西環地鐵開通始終係一件好事（大家都等左30年以上，並非民建聯成功爭取20年），今日隨心因為地鐵開通而寫吓字，無太大恩喜反而有少少目睹人情味流失而擔心。