古語有云：「世有頹飯，而後有大學生；然大學生常有，而頹飯不常有。」
頹飯其實不差，勝在填肚多汁撈飯，養活了無數大學生，才有力走堂耍廢 Dem Beat 成吉思汗。然而生多飯少，為了頹飯排隊成慣常，食過頹飯又難敵睡魔。
幾乎所有大學，只有高檔連鎖店的咖啡略有水準。點樣可以排一次隊滿足兩個願望？一，比頹飯好味嘅飯；二，比連鎖店好嘅咖啡。
但在中大真的有望。
＊ ＊ ＊
圖 1：劉海龍、小西（中大老師）
合計讀書歲月，劉海龍在中大日子長達 11 年，說起來他也很震驚，「嘩，大鑊！」
問到對中大名物有何感受，劉連珠發炮為母校護航，「頹飯好呀！夠本土，夠實惠囉，又平又食得飽。」
但劉和小西都說今時不同往日，新的 Canteen 通常由大集團營運。如今的頹飯「質素頹」但「價錢唔頹」，唯有眾志堂是「頹中之頹」，才可保持質素與價錢皆頹。故兩人不同意網上有謂 PC「中產」、「士紳化」。
沒有上鏡的女士說，PC 的「哥哥好溫柔」。劉解釋中大某一食堂有一「躁底阿叔」，早已揚名中大，PC 的服務顯然更佳。不過小西也批評 PC 的飯太生，音樂太吵。
＊ ＊ ＊
圖 2：方先生（中大員工）
方先生是中大職員，伴隨頹飯生活兩年。問他有何評價，他沉吟良久，回答非常得體：「唔。。。一分錢一分貨，飽肚唔係問題。」他既欣賞 PC 的裝修，也欣賞能在山城找到其他選擇。
＊ ＊ ＊
圖 3 - 6：店長 Bonny
莫誤會個子小年紀輕的她是店員，其實 Bonny 是中大 PC 店長。
昔時她尚在大專，學校有連鎖咖啡店，喜在那兒消磨日子，從此投緣。最初在咖啡店兼職，漸漸全身投入成為咖啡師，至今已有八年。
Bonny 早於微時認識 Brew Note 老闆 Vincent，討論咖啡，亦師亦友。「有時我真係會叫佢老師。」當時 Bonny 輾轉在不同 Cafe「炒散」，Vincent 早已欣賞她的才華。後來不但邀請她加盟，更派她到中大開荒鎮店。
「我既第一份咖啡店工作就喺 Poly U，嗰度係我啟蒙嘅地方。我好嚮往大學同出面舖頭完全唔同嘅節奏。自己係時候進步，能夠幫到 Vincent 亦好開心。」
當店長不止要沖咖啡，還要兼任管理，每天工作長達十小時，Vincent 曾不下一次致電要求 Bonny 放工。「開舖呀嘛，較多嘢做。佢都有叫其他同事收工。」
她總結新一頁：「而家我唔再只為自己工作。以前我純粹想沖好一杯咖啡，咁就功德完滿。而家就要耳聽八方，關心周圍發生咩事，而且要從容面對每一場面。要令每一個客人即使唔開心入嚟，但都開心咁離開，就係最重要嘅任務。」
時下很多年輕人發夢，就是夢想開咖啡館。筆者問她對發緊夢嘅後進有何建言。
「吓？講左都唔聽架喇！點解唔自己 feel 吓，咁樣仲好玩。我嘅經驗未必 fit 大家，開嘅係同一間舖，但擺喺北角同中大就好唔同。」
「如果您自信鍾意咖啡，就要抱住同樣熱誠，攻克所有細節，先可以完成依件大事。」她說 Vincent 之所以能經營好咖啡店，就是他對每一件事都如對咖啡般認真。委派她來中大掌店，正是期許她的修為能更上層樓。
＊ ＊ ＊
圖 7 - 8：Vincent
Brew Note 聲名益顯，老闆 Vincent 亦為人所知。當他得知中大有吉位丟空半年，躊躇了好些日子，不知跋涉上山開首間分店是否值得的冒險。「嚟到大學一定要就返價錢賣平啲，唔知有冇得做。」但衡諸中大人口眾多，年輕人對品味有更高要求，終於下決定心，篤定「做得過」。
他思忖一間大學 Cafe 需要什麼，考察得知中大多的是中餐西餐，故以日式作招徠，並以日式虹吸咖啡為主打，避免與總店重覆，各擅勝場。他又想到中大生多踢拖出門，索性在店內設一處榻榻米，另設較私密的包廂卡位，供學生溫習。他希望給舒服的空間予學生，以咖啡解功課寂寞，遂定名為 Paper & Coffee。
網上有見「中產」和「士紳化」的批評，Vincent 答餐廳的選擇可貴可廉，「一餐飯可以五十蚊有找，應該平過蘭苑。」
「正如落地唔等於要污糟，我只係想做一個乾淨啲嘅空間。」至於咖啡 Vincent 則較在乎，他希望學生接觸精緻的咖啡文化，俾讓他們品嚐到精品咖啡。
＊ ＊ ＊
圖 9 - 15：Paper & Coffee 風景
＊ ＊ ＊
後記：
文首的「廢文」其實別有意思。
Vincent 長駐北角 Brew Note，間或會到 PC 幫手。至於 Bonny 則每日去 PC 都可以見，請各位同學留意！