文：威
你，仲記得玩具帶俾你嘅滿足同快樂嘛？
呢條問題我成日都會問自己。
成日覺得，即使我地呢啲八十九十後而家嘅生活幾唔如意幾艱苦都好，我地生於既年代係幸運多於不幸。
因為，我地係仲有童年嘅一代。
因為，我地仲會感受到玩具帶俾我地與別不同嘅快樂。
玩具帶俾我地嘅，唔只係快樂。
我地應該唔會對以下對白無印象：
「係你啦！比卡超！用十萬伏特！」
「亞古獸，時空進化！戰鬥暴龍獸！」
「我要替月行道，警惡懲奸！」
「超熱血合體！龍王修羅！」
細個放學嘅時候，你，妳同您都會衝返屋企，校服都未換就開著部電視，睇嗰陣仲有卡通片時段嘅《閃電傳真機》同《至net小人類》。一度期待住今集嘅卡通片會有咩戲劇性發展，一度拎住個屬於個套卡通片嘅玩具幻想自己就係卡通片入面嘅主角可以拯救世界。（跟住趁卡通片做完，未播六點鐘新聞報導老豆老母未放工返屋企嗰陣用九秒九嘅速度做曬啲功課。）
係呀，我地就係生於呢個美好的年代，有著美好的共同回憶，相信玩具同卡通片一定有不可取代嘅角色同地位。而當中最能勾起大家回憶嘅，電波暴龍機一定有份。
想當年，每個細路手頭上一定至少有一部電波暴龍機，隻手chok到手抽筯咁去計步數，等自己嘅「拍檔」可以儲夠dp（digivolve point）去進化做完全／究極體，去同其他細路或者版圖大佬用「雙波」打到天昏地暗。同其他暴龍機唔同，電波暴龍機係根據卡通片主角們手持嘅機為藍本，有八種主角配色，加入冒險元素，透過步行戰鬥來經歷卡通片劇情。
呢部機當時牽起一股大熱潮，原因並唔只係佢擁有以上之處，佢最吸引之處，係佢令當時嘅我地所幻想嘅野接近成真，令我地擁有屬於自己嘅虛擬拍檔，更令當時我地了解到一啲書本唔會教到嘅事。
玩具帶俾我地嘅，唔只係快樂，仲有確切嘅不同情感。
勇氣，友情，愛情，知識，純真，誠實，光明，希望喺呢份玩具上面利用八種配色同徴章教曉當時嘅我地呢一啲人嘅性格。太一嘅勇氣，大和嘅友情⋯呢啲所有所有已經從呢部機帶左俾我地，成為我地嘅共同回憶，亦令我地所擁有嘅童年逐漸變成今時今日我地呢一代嘅意識形態。
我地呢一代，係幸運多於不幸的，係被選中嘅細路，被「童年」選中嘅細路。但願兒時所擁有嘅記憶能夠不斷提醒我地如何喺呢個世代洪流保存一顆屬於我地嘅心。
玩具就是能令我們記起一些該記起的事。
P.S.，半年前，日本為慶祝數碼暴龍01十五週年而重製左呢部夢幻神器，媽啊我好想要但已經賣曬！
PP.S.，唔緊要，仲有徴章賣，有買襯手啦喂！