「嗱，四四正正，間隔實用，呢邊擺完張床仲有位擺張枱仔食吓飯上吓網咁。」梁sir說。
這三個月以來，本身是香港警察的梁sir發展出好多個身分，公安、企街、垃圾佬、播音機、牧羊人、慈母……現在更擔當起sales佬來，相當百變。不過，他不但毫無怨言，相反還覺得份工越來越好玩兼有挑戰性，用盡最低武力扑人時還可以借老強兇吓學生妹，都不知幾爽。況且上頭都待他不薄，為免班暴徒滋擾他及家人，刻意安排這個不用見光的工作等他避避風頭，聽講游說到最多人簽同意書那位，更有得追加勳章呢。所以，雖然梁sir好唔妥這班廢青垃圾，都盡量忍辱負重先。
阿仁看到個單位呆了半晌，忍不住讚嘆：好耐都冇見過咁正常既單位喇！間隔實用是因為無間隔可言，但200呎就是200呎，冇懸棺露台同大大個窗台或者工作平台。入到廚房轉唔到身但至少煮到嘢食，唔怕觸動灑水系統。廁所雖然是黑廁但起碼有道門遮擋。面積大過嵐山細單位，而且不用對住山墳，夫復何求！
當阿仁沉醉在眼前這個絕世好單位時，梁sir以為他正在猶豫，就再落嘴頭：「嗱，簽個名，個單位就係你架喇！」
昨晚明明被警賊打傷左眼角，在拘留所吹足幾粒鐘大風扇，阿仁忽然被網上爆紅的好戲之人梁sir帶到這裡，還聲稱有好嘢益佢，件事實在太難以置信喇。聽聽條件先：
「條件好簡單啫，第一，以後唔准擔遮，落雨著雨褸。」頭號攻擊性武器，當然要禁止。阿仁想，不能扮黃飛鴻，大不了學李小龍，be water，雨遮不過是icon罷，冇問題。
「第二，以後唔准穿／戴任何黃色嘢上身。」黃色衫一向難carry好少著，藍底黑字就唔可以寫我要真普選咩！
「第三，以後講嘢唔可以『我要』、『我要』。」嗯……咁真普選萬歲啦。
「第四，以後唔准喺討論區留言。」五毛討論區，不看也罷。
「第五，以後唔准鳩嗚。」
「阿sir，落街買嘢係咪都唔俾先。」
「你同我收聲，我分得出你係買嘢定搞事。」
「第六，以後唔准進行任何反政府活動。」
「即係點呀阿sir？」
「即係同一般香港人一樣，做沉默既大多數！」做港豬，有樓住……
「最後，唔准同任何人講關於呢份約既嘢。」出賣團友仲好意思講咩……阿仁想到過去幾個月出生入死的兄弟隊友，想到這個不仁不義充斥狼鷹牛鬼蛇神現在還想用層樓收賣他的政府，不由得無名火起。
「仆街我同你好聲好氣你唔簽，係咪要我打斷你隻手印個指模上去呀！睇你個廢青日日瞓街一世都買唔到樓啦，以後點結婚生仔呀，係咪想俾外母一世睇唔起呀！」梁sir開始不耐煩。
阿仁很想跟他解釋他並不是廢青，大學畢業出來打了幾年工，只是人工永遠追不上通脹，晚晚OT但不能以壓力爆煲為由隨意發泄，不過說出來大概也不是人工不錯又有宿舍住的人能明白，還是慳返啖氣。而且他的說話也非沒有道理，阿仁想到女友卿卿，有少少港女格但不算大貪，有層私樓已經好滿足……就在阿仁天人交戰、情義兩難全之際，手上支筆已經慢慢移動……
「咁咪好囉，皆大歡喜。醒醒定定呀，隨時收返你層樓拉你坐監。」臨走前梁sir還抱著阿仁的頭拍了張自拍照，露出勝利的笑容。阿仁靜了下來，才看清楚份約最尾有行好細的字，違約者無需經法庭審理，一律判監十年。
咁大獲！！！不過學做一隻港豬，扮吓瞓覺應該唔係好難既啫，阿仁安慰自己……
慢著……跟港共政府簽約，大抵和《中英聯合聲明》差不多，龍門任佢搬吧……
橫死掂死，溫水煮蛙終須一死，現在至少有瓦遮頭。怪自己太傻太天真，倒不如及時行樂吧……
「卿卿，我做了業主喇！」茅塞頓開，阿仁歡天喜地打了電話告訴卿卿這個好消息。
梁sir一路搭lift一路數一數手上面叠單，今日做了8單，成績相當不錯。落到大廈最底層由會所改裝而成的控制室，一整隊特別監視組猶如電視台監製，緊張地對不同畫面指指點點。
「5C想開港視睇《選戰》？網絡擠塞load唔到架喇，睇返CCTVB啦。8E咁勤力做運動做咩呀？同我喺中央冷氣放返啲香氛，等佢恰陣先。11A個樣好躁喎，俾啲古典音樂佢聽吓。」
「喂，呢邊有正嘢睇喎！」原來是剛才阿仁的房間，他跟卿卿終於不用等兩老行開，都可以享受甜蜜的二人世界了！
「喂，唔好掛住睇嘢，錄起佢，第時好有用。」長官大聲叫下屬。本來任職反黑組的他因為暗角事件聲名大噪，榮升秘密保安局副局長，意氣風發。
看著比AV好看的真人show，我幾時先可以落嚟印印腳睇嘢呢，梁sir不由得羨慕起來。