如果你同我一樣在公屋長大，我哋呢啲「屋邨仔」到球場踢波或打籃球，都會奇怪點解連網都冇個！一個網啫，有幾難呢？事實上就真係冇。有時谷氣上嚟，就算冇咁方便，都要約朋友去康文署場打！
當唔合理嘅嘢存在咗好耐，大家就習以為常，就以為已經唔存在，亦唔會再去追問點解。
大概兩年前，我工作嘅屋邨偏偏有位阿叔就係睇唔過眼。佢阿叔日日定時定候都會到邨內球場打籃球，但就為咗連網都無個而氣頂。佢話過去多年嚟，搵過部門投訴，搵過以前區議員反映，但都冇下文，最終才搵著我。當時我雖然唔係議員，但係心諗：「裝個籃球網啫，會有幾難唧！」點知﹐一搞至今年半有多。
〔自己球網自己掛﹗〕
期間，與地區房署以及房屋總署信來信往，由最初一口拒絕，到之後覆會研究；之後再追問，又覆會再研究；再追問，又覆再研究；年幾了，既未有研究結果，又無正式拒絕。官僚嘅嘢，有時大家都明啦——第一，既然全港公屋都無嘅嘢，無理由我條邨做先，有鑊咪要我孭？第二，你班友仔成日玩爛個網咪做死我！
好喇，拖拖拉拉咗年幾，我自己亦由唔係議員到今日要向市民交代；加上，越嚟越嚟多後生仔及同學仔在阿叔感染下向我反映，始終有啲工作要做嘅！
早幾日，心諗，你房署唔做我自己做——自己同阿叔一齊「掛網」兼「上網」！
個多月前，我其實亦與屯門區議會其他民主派朋友提出動議，要求在公屋內籃球場足球場加設球網，並同時改善相關設施如設自助飲水機、裝儲物櫃放銀包手機及為石屎場舖地膠。
〔踏出了半步，應該係〕
今日，區議會下工商業及房屋委員會終就提案作出討論。會前兩、三天收到部門回信，劈頭就指我哋提出嘅種種設施建議都唔係房署管理下公屋的標準設施﹗吾吾﹗不過，出席會議嘅房署代表指就加裝球網呢樣可以搵試點試行，咁樣，算唔算係行出第一個半步呢﹗
除加設水機外（代表話問過衛生署話因衛生問題唔裝得，咁點解康文場又得呢？），其他如儲物櫃、鋪地膠等同樣會研究後試行，而部門亦會於下次會議時交待工作安排及時間表。
終於，終於，搞咗年半有多，今日總算踏出了半步，半步咋！
我唔算有咩開心，還有小小擔心，唔知單嘢會唔會爛尾。再者，我真係真係希望我哋嘅「屋邨仔」，萬一有關設施真係落實，我哋真係唔好衰俾人睇，攞個公德心出嚟，錫住啲公家嘢，塞住啲官嗰兩個口，等佢無藉口唔做嘢！