睇完毛記分獎禮，真心覺得勁，簡直係個歷史性嘅 event，因為佢成功將一般老 Seafood 以為只局限於網絡世界嘅文化（潮語、in-joke、二次創作、社會性議題等），通過電視直播落地，實體化，更促成「真.社交行為」（買飛入場、集體觀看戶外直播），仲變成可以生財嘅 business model（賣飛、有贊助、有廣告），應該會令一眾以為沉醉網絡世界嘅「廢青」係「玩玩吓，冇Q用」嘅老SF 大為汗顏。當然，呢啲人大有可能根本唔知有個咁嘅 event，或就算睇咗都唔知佢噏乜，睇唔明；呢啲人，係徹底咁同時代脫節。
但笑過喊過後（睇繁忙兒童合唱團唱「無間做」時真係喊咗出嚟），自己都有啲 shock，驚見呢個新時代巨輪轉動之快，快得連自問都算係個網L 嘅我，都覺得有啲追唔切，稍為一晝冇上網，就可以唔知個世界發生緊乜事！咁睇，啲老SF 又有乜可能跟得上？有乜可能會明白新世代嘅人諗乜？面對呢啲佢哋完全唔明同 follow 唔到嘅物種時，佢哋就越發自我保護，越堅持自己嗰套係啱（買到樓先係成功），越唔願意溝通，越去話你廢嚟撫平心底嘅恐懼，甚至越去諗計打壓你令你變成真廢，so that 可以霸氣講句「都話咗你㗎啦！」呢種鴻溝，都唔知點駁番埋......
分獎禮之所以引起咁大迴響，當然由好多客觀條件造就出嚟：
（一）對坊間一次創作（新作品）嘅離地、無關宏旨、連結唔到生活現況等嘅不滿，造就對呢啲有 feel 嘅二次創作嘅熱愛；
（二）對傳統媒體嘅絕望，造就對新媒體 model 嘅力撐；
（三）對社會／政治現狀嘅憤怒，造就對強烈嘅社會／政治性嘅二創內容嘅強烈共鳴；
（四）「香港／香港人」身份同權利被嚴重打壓／剝削所產生嘅冤屈，造就整晚強調「香港價值／本土」嘅吸引力；
（五）對政壇／whatever 壇人遂嘅厭倦，造就樂見「素人抬頭」嘅渴望（全晚演出者，大多係素人，即使何國榮係藝員，但都算係歌手中嘅素人）；
（六）身處苦況嘅無力感，造就 event 嘅「治癒」效果，令人覺得透過支持個 event，對呢啲苦況做咗啲嘢；
（七）整體大環境所製造的窒息，造就受眾對「有個 event 可以令我笑吓／出返啖氣」的巨大需求。
因此，對於嗰啲認為現狀「冇乜嘢吖、幾好吖」或對時事一無所知嘅老SF或港豬而言，必然唔會有上述嘅共鳴感或需求，亦必然會唔知個 show 做緊乜，有乜咁好笑啫？
當然，亦會有人唔認同個 show 嘅品味（因此覺得唔好笑），或真心覺得呢類 show 只會製造更大嘅犬儒，令人不思抗爭。我認為呢啲諗法都 valid，毋須強行爭辯，但我個人傾向支持任何通過 create （創造）一啲嘢出嚟試圖改善現況嘅努力，因為我總覺得只要創造咗啲嘢，效果其實係讓子彈飛，可能有人會變得犬儒，笑完當搞掂，但難保有人之後會覺得充滿力量，繼而投身改變現況嘅行列。
分獎禮俾我嘅另一提醒，就係好認真好認真咁玩（或所謂認真做柒事），係可以好獲得認同。但我都會問，咁好認真好認真咁做正經事，點解又未必有咁嘅效果？
最後，多謝贊助商真係好似多咗。雖然夠膽贊助呢個 show 係值得肯定，但唔使咁多下哇......而且油公司嘅惡行，file 成十幾層樓厚，又何只北極開採咁簡單（借 link from Tam Daniel）？
梁振英上年施政報告就開名鬧學苑鼓吹港獨，唔知今年會唔會開名批毛記呢你估？