最近H&M請到兩個大明星幫佢地拍廣告，一個係Kevin Hart，一個係萬人迷碧咸。先唔講個廣告好唔好笑（其實我冇睇哂），淨係見到咸爺著住一身H&M嘅衣著型味盡現，已經令人有衝動想買返一件。特別係H&M重點賣廣告果件長袖線衫（即係我配圖果件）二百有找，好似搵唔到唔買既理由。當然啦，依個就係H&M最想比到你嘅諗法，佢比咁多錢咸爺著衫都係想靠碧咸著住件衫吸引消費者搵你地搵錢。其實有個事實大家應該一早知道：無論你著咩衫，你點都唔會變碧咸。
潮流依樣野係無底洞，你一但迷上，每季換衫嘅錢唔講得少。好多品牌鍾意搵型人名星代言，然後用盡一切方法令你覺得只要你跟住著你就一樣可以變得咁型。其實用腦諗下都會知道咁樣係冇可能，高登以前有張圖將陳冠希同一個街邊阿伯既衣著調轉，結果希哥可以張一件菊花牌底衫著到潮牌一樣。假如有一年又興返著OVERSIZE既滑板LOOK，身高冇米七既可能著完已經見唔到你大脾，到時一樣唔好睇。著衫唔應該睇潮流興唔興，而係睇自己啱唔啱。好似我知道我著唔到大格仔嘅衫，就算格仔每幾年實會興返起都好我都無謂跟風，因為我著左上身唔係潮人，只係一個柒頭。
有一句說話我好鍾意：每一個人都係獨一無二。個個人氣質身高肥瘦有別，自然要襯返唔同打扮。早排女仔好興ABC頭牛仔短褲加對拖鞋，結果出轉街你就以為A&F搞緊員工大遊行。我唔否認有部份咁嘅LOOK係幾好睇，但係一街都係嘅時候，其實大部份人只係做左陪襯，潮味我唔覺，隨波逐流就好明顯。MK小小講句，你要型，起碼夠特別先啦，一眼望過去十個八個著唔多樣嘅，最後咪只係變左平凡。你買H&Ｍ都仲好丫，平嘅一二百，西裝褸都係收你$799，有限錢；你死慳死抵買件Visvim返黎，結果學唔到摩佬做個Special One，到時就真係喊都無謂。
其實我寫依篇文嘅原因係因為我早幾日係H&M門口見到一個著緊件$199線衫嘅男仔企正係碧咸個廣告面前。係果一刻，我就立即打消左買依一件衫嘅念頭。
一個讚好，是對我的一點支持。
如果想分享給其他朋友的話，請標明出處並附上專頁網址。