上次篇文都寫過，賀歲檔期，基本上你霸到銀幕就等於印銀紙，點控制成本就後話。不過，都有人挑戰底線，都有能人所不能既例外。黃百鳴就係今年仆直的例外。
上次講到黃百鳴套「浮華宴」要特登開篇文寫。唔少人引頸以待，以為我會將佢大鞭特鞭。果然中國人鍾意睇行刑，新年流流都想食血饅頭。但太爛既戲，除非我果排真係極得閒，否則真係寫都無謂。雖則話寫文為左自High（唔通為左拯救香港？），但都要時間嘛。
例子? 例如套 「格雷的50道色戒」（Fifty Shades of Grey），原本想寫篇文恥笑，最後還是覺得唔好浪費時間。覺得我需要講明點解差先唔膚淺，既果啲所撚謂讀者，就自己入場睇多幾次啦下。所以同樣道理，上一篇既然寫得賀歲三港片「12金鴨」「衝上雲霄」同「賭城風雲2」，證明三套都不算好差。當然我將佢地三合一寫一篇，亦證明好極有限。
而開宗明義，「浮華宴」未必係咩佳作，但就一定比另外三套賀歲港片為好。再差都好，至少，呢套係套有誠意的電影。至少，姑勿論出於咩動機，黃生有嘗試過bring something different。
如果玩聯想練習，一講黃百鳴，當然係諗起開心鬼，同埋許冠文。黃許二人我細細個開始睇，而家一提起佢兩位，你既反應當然係 「OUT左九世仲食老本以為自己好好笑」的兩條老而不。但至少，許冠文在葉大導套「Delete愛人」，當然冇「轉型」，但不致於令人討厭，比起拍「煎釀三寶」時好得多。黃百鳴呢，就得罪講句，即使三十年前我睇開心鬼都唔係好識笑（睇李麗珍羅明珠咋，你估睇朱秀才咩），而家更不用講。
事實上，在一般年青觀眾眼中，黃百鳴此人討厭非常。其一當然因為佢既政治取向。但即使唔講政治，佢近年既戲，都真係相當唔掂。上篇文都提過，每年一度的賀歲片，我總係鍾意曾志偉（或TVB）果套多啲。而黃生拍「開心魔法」仲要拎番「康森貴」呢啲千年殭屍出黎自瀆，實在令人頂唔住。又係果句，堅持要好有深度講有套戲幾不堪既，我寧願買隻碟請你睇。
但，一單還一單，撇除以上種種惡劣往績，今次「浮華宴」始終係有點誠意的。
套戲講乜，不再重覆，想知既自己睇簡介或買飛入場。但其實甚至不用入場，都大約估到套戲唔會極差。原因好簡單，個劇本係改編外國的- 咪好咯!
「浮華宴」改編英國舞台劇An Inspector Calls。個劇本算略有名氣。黃百鳴苦口婆心，仲荒死大家唔明唔識貨，完場時話你知，拿，個劇本人地英國讀文學都拎黎讀的，好野黎的。
呢個劇本仲老過強國（1945年首演），經得起時間考驗，質素不用懷疑。我冇睇過原著，但就我理解黃百鳴冇自作聰明，劇本變動唔算大。咁而堆演員曾志偉毛舜筠林家棟等等，你總唔會話冇料到唔識做戲呃飯食。所以十分簡單，唔入場都會估到，套戲，係OK的。
但，呢套OK既戲（至少我敢講唔會差過另外三套港片），票房就仆到直了，口口碑亦差。我睇果一場，觀眾睇到媽媽聲。完場頻呼「都唔知噏乜鳩」。更加有觀眾一路睇一路睇戲（係，在電話睇第套戲，開埋聲添）。為求科學（!）起見，我問埋另一朋友，佢果場的現場反應都係咁上下。
套戲問題在邊？咪又係「期望」。觀眾見到你黃百鳴就係expect睇xx喜事 開心魔法 青春鬥 （對，入埋佢數）嘛! 你整套英國舞台劇？梗係死啦。黃百鳴仲夠哂忠於原著，一眾演員的表演方式，對白等等，都十分「舞台劇」。咁梗係睇到觀眾媽媽聲 – 人地諗住食junk food 嘛！做乜organic 食草？香港既觀眾接受能力好低架咋。
事實上，「浮華宴」個劇本，夠哂有寓意。1945年的劇本講1912年既古仔，但放到2015年一樣不過時。除左踼爆中上流社會的虛偽外，個古仔充滿宗教意味。 （OK， 以下含劇透） 古天樂的「偵探」角色就係復仇天使或先知。預先話比大家知，你地每個人都有罪，但我無所不知，比個機會你懺悔，唔該悔改。周秀娜一人分飾六角演的「受害人」係一個象徵，並不一定（好可能唔係）係同一個人。黃百鳴更加驚死大家唔明，畫出腸話埋你知，每個人犯乜野罪。到結局另一「偵探」陳慧琳出場，更加話埋比你聽係Judgement Day，夠明顯啦掛? 咁都仲話唔明講乜既，只怪觀眾太低質，唔好怪編導演員 – 即使果個係黃百鳴。
我想講既係，黃百鳴今年唔搞xx喜事xx飯店唔做開心鬼。企圖「比啲新野」觀眾，換到既係票房仆直兼比人恥笑。唔止，連睇既都比人恥笑。 「睇黃百鳴？唔撚係丫嘛」。
最有趣既係，根本冇人理過套戲其實係點。冇一個睇過戲既人質疑其他人點解睇。所有質疑都係黎自根本唔知套戲講乜既人。
但而家唔係幾廿年前，咁多戲院上既戲，唔存在「地雷」。就算大家誤解左都好，照計有人睇過就可以「平反」。但結果係點呢？互聯網社交網方便左我地交流意見，但我地既眼界有冇闊到？定只係更加圍埋一齊互like互jerk？十分明顯地，呢個例子再證明，而家的世界，大家更快歸邊，更唔願意花時間去了解所謂的「本質」。 總之黃百鳴就係爛片啦。你興登堡寫埋啲野就係唔知噏乜鳩啦。
所以我既結論好簡單。好多香港導演，唔一定係仆街，唔一定冇誠意，不見得拍唔到好戲。但，why bother？ 觀眾鍾意屎咪比屎佢食咯。認真整個劇本？拍垃圾收得仲多錢仲多人讚喎。擴闊觀眾視野？觀眾唔使呢啲野架。佢地年年食麥當勞得架啦。而呢樣野，十年前劉偉強拍「頭文字D」時我己經講。
重申一次，我唔係話「浮華宴」有幾出色有幾有深度。問題就係我地甚至連一套稍為有少少破格的電影都容不下。即係，下年你地都係繼續睇 xx喜事啦。有咁既觀眾咪有咁既作品。 You deserve it。而我還是慶幸自己睇左「浮華宴」。有今生冇來世呀。