林子健案因為傳真社發放嘅閉路電視片段而峰迴路轉，香港警察Facebook專頁就即刻出咗一個「跟車太貼，易生意外」嘅帖文，抽水抽到盡。其實係呢個越嚟越荒謬嘅香港，有咩係無可能發生？實情就係是非黑白可以互相顛倒，無論你點跟都一樣會中伏。既然偉大嘅警察咁鍾意回帶，等我同大家回下帶，又睇下跟得貼唔貼！
2008年，警員梁禮仲係電腦私自取得女事主嘅個人資料，故意叫女事主深夜去旺角警署，繼而帶去認人房強姦。事後，呢位梁生更加被控係11月14及17日非禮另外兩位女報案人。當年呢單案真係轟動全港，大家都估唔到警察知法犯法都呢個地步，而且仲猖狂到係警署發生。呢手車，就算司機係鄭伊健都一定炒啦！
2014年10月15日，大量示威者佔領龍和道，七位「盡忠職守」嘅警察制服曾健超之後，用膠索反綁佢雙手，再抬到添馬公園內一個暗角，拳打腳踢之餘，又用鞋底不停踩佢，打足四分鐘，之後就被被帶走。雨傘運動，令我哋見識好多警察嘅黑材料同埋手段，一步步淪為政治打壓工具，試問又有邊個估到呢架車已經失控到呢個地步？
2015年4月，沙田美林邨發生老翁放狗時被殺案。5月上旬，警察高調拘捕一名智障男子誤殺，但實情是該男子當時身在院舍，警方知道自己拉錯人之後低調撤控。事主家屬要求警方道歉，一哥話沒人需要負責，5日後警方發表聲明，話對事主及其家屬帶來不愉快經歷表示抱歉。未查明真相就亂拉人，仲要一開始死都唔認，然後呢？面就人哋比，架就自己丟囉。
2015年3月1日，一位女文員吳麗英參與光復元朗行動，被警員拘捕時不但搞到口鼻都係血，更加被控用「胸部襲警」，最後佢竟然被判罪成入獄3個月15日。呢件事除咗反映法官質素低下之外，亦令香港柒出國際。判案之前，大家都認為呢條罪一定告唔入，點知? 我肯定大家都撞晒車，而且焦頭爛額添！
2016年2月15日，39歲已婚警員黃偉洪趁老婆大肚就搞埋自己個仔嘅13歲女同學，事後更保留染有女童下體血漬的紙巾，非常變態。身為執法人員，但罔顧道德同法律責任，不知廉恥，最後承認非禮、企圖非法性交及非法性交共3罪，結果被判囚3年8個月。廢青不禁要問，警察性慾係咪真係大到咁？去嫖妓又唔肯比錢，到底想點呢？
2017年2月22日，3萬名休班或退休警務人員及家屬夜晚係警察體育遊樂會聲援七警，但係警務署網頁未見到任何公眾集會或遊行通知，集體講粗口之餘又錯誤比喻自己係猶太人，明明已經係非法集會，但又要死撐唔係。我當時都跟得好貼架，好期待盧姓署長點樣解釋，點知都係龍門任搬。
呢架法治之車，以後仲要撞幾多次？