在與朋友的whatsapp group，突然收到一個令我感歎萬千的whatsapp。
她說，在去某補習社油麻地分校補習時，搭lift上去嘅時候，門偶然打開時，竟然遇上了當年我們夾band租band房的那一層。【而當年我地隊band嘅名，現在回想就是不要再說了云云的感受】
我係呢一個moment，我頓時感到成長係幾恐怖，幾令人害怕嘅一件事。當年載住我地上去所謂勇敢追夢夾band嘅嗰一部lift，宜家變成了載住我地每日放學，上去補習社，補習補到天昏地暗，嘅一部lift。
當年，係帶住我地開往夢想嘅勇敢發現號；宜家，變成帶住我地，用瘋狂補習開往現時人生所謂最大目標，取得大學入場卷。
有人話，好正常啊，以前細個唔知頭唔知路，先走去做埋D咩勇敢追夢夾band嘅野；宜家？發現殘酷的事實，無可能再浪費時間再做埋D咁嘅野啦，你入唔到大學，夾咩啊，去零食鋪夾糖就有你份。冇個學位，社會上嘅『成功』呢個字離你簡直十萬九千丈遠。
成長，令身邊人事全非，從前身邊的人散佈四海。從前想做嘅事，宜家基於種種原因，沒有辦法再去實踐實行。
時間一去不返，唯有捉緊現在，我仍然希望想辦法去嘗到夢想嘅滋味。
夢想，無論係乜野，請你，可能嘅話，千萬不要放棄，永遠也不太遲。有人話，追夢的人，有的是青春，衝勁，有的是一團團的火。其實，只要你想，到六十歲仍然可以很青春。
亦有人取笑追夢的人，太天真，年少無知。
巧合地，我當年夾band其中最先夾嘅一首歌，正正就是年少無知。但就係一份年少無知的勁，造就不少成功的追夢者。
我嘅夢，係成長洪流中被迫先放下。我嘅band友們，你又記唔記得那些年，我們瘋狂夾band的日子？你願唔願意，係不久嘅將來，同我一齊重新拾起？
我嘅夢，暫且如此。你嘅夢，又如何？
〈恆〉