There are some things money can't buy… ... …and apparently, basic general knowledge about the very subject of your movie is one of them.
上次寫「解碼遊戲」（Imitation Game）又有人覺得我懶撚係野特登扮勁，百彈齋主乜戲都鬧，雞蛋挑骨頭，「咁叻你拍一套」。真係法官大人冤枉呀。首先呢，我講到明，「解碼遊戲」唔差，只係個編劇扮哂野。二來，其實我冇刻意去將就，但我寫「飛鳥俠」（Birdman），「頭條殺機」（ Nightcrawler）甚至「浮華宴」都係讚的。
上次篇文都提過，其實太唔掂既戲，我少寫。除左因為浪費時間外，亦因為，其實我唔係好識寫爛片。呢句係真心的。例如我原本想寫「格雷的五十度色戒」（Fifty Shades of Grey）。但一仔方俊傑，同埋日月報家明，都己經寫（踩）得太精彩（實在精彩，記得去睇），我有啲自知之明，就無謂班門弄斧。當然我可以寫得更加浮誇，但最後只會演變成杜汶澤評3D肉蒲團之類的嘩眾取寵，非我所願。
正如睇「對面的男孩殺過來」（The Boy Next Door） 前己知呢套係金草苺大熱，爛到不堪。入場前我仲拜讀左林兆彬篇文，自覺都好難寫得好過佢。
然後又點呀？又真係估唔到，我都仲發掘到新角度喎。上次寫解碼遊戲同你講德文（其實係常識）。今次寫「對面的男孩殺過來」，同你講希臘文學（其實都係常識）。
岔開一筆，週末仲睇左成龍大哥的「天將雄師」。撇除當中十分政治政確的「世界觀」黎講，套戲還算不錯。奧斯卡影帝Adrien Brody演出落力，搵人仔都絕無渣流灘，夠專業。
但，李仁港話自己讀歷史，大佬，西漢年代講英文都算（反正荷里活片都係咁）。但，邊個歷史老師教你西漢年代就全部寫楷書？冇野下話，爭在唔係標楷體。仲要西漢時代番學己經教白話，真係笑Q死人咩。轉下FONTS有幾難呀？吹脹在，驪靬REGUM，佢又識寫番做REGVM喎。真係中國人好呃啲？
不過同情地理解，整道具既錢慳得就慳，大多數觀眾可能都冇乜所謂。正如「解碼遊戲」讀錯Euler都唔係劇情重心，可以原諒既。
去到「對面的男孩殺過來」就經典了。
劇情話咁快講完。J Lo（Jennifer Lopez喎大佬，J Lo喎，睇個籮都值回票價啦，相信好多人包括我係因為咁入場）係失婚靚媽仲要教書，遇到個仔既同學又大隻又靚仔又好似好心地。忍唔住上左床。點知條友變態既，會放閃卡仲殺你全家。講完。
咁笑位在邊？笑位就係，X人老母就X人老母啦，stalker就stalker啦，仲要學人玩品味！仲好衰唔衰學「格雷」。真係用我常用既句式，如果你鍾意格雷，你鄙視呢套戲啦，抄格雷。如果你鄙視「格雷」，更加恥笑呢套戲啦，居然cheap到要抄「格雷」。
是的，記唔記得「格雷」呀唔梳頭SM大王溝大學生，咪送左本書比佢既。咩書咁巴閉？黛絲姑娘（Tess of the d'Urbervilles），不過係初版。珍貴得黎又有品味嘛。
去到「對面的男孩殺過來」，東施效顰。大隻仔想溝古典文學搣時J Lo（對，J Lo做古典文學搣時，下次不如搵蔚雨芯教佛學）。又送本書比佢喎，又係初版喎。感動到J Lo水（眼水啫）都標埋。咩書咁巴閉？荷馬（Homer）既「伊利亞德」（Iliad）！
仆你個街公元前700年希臘己經有印刷術？仲要英文版添！仲要硬皮！有冇ebook呀？文學搣師居然拎住本好似企鵝書咁的東西，狀甚感動出哂水。我就笑到標眼水。呢個，其實係幾千年前的都敏俊下話？
又係果句，我出聲你地就話我挑骨頭扮哂野，但鬼佬一樣抽到水都乾。自己上網睇。
更好玩既係，在網上書店，呢個”The Iliad, first edition”成為最熱門搜尋
所以呢，弱智起上黎，荷李活片一樣笑到你死。編劇夠誠實，或者都知自己膠左，總之佢就話唔關自己事，「人地改我啲野咋」
不過你恥笑還恥笑，套戲爛還爛，絕對係commercial success。票房收回成本至少10倍。很想要吧？
相當有趣地，套戲成本只係400萬美金。你冇睇錯，係400萬美金。票房就收4000萬。咁就真係將就下，大佬，李仁港套「天將雄師」成本7000萬美金咁滯呀。
但即使再粗製濫造，我都好難想像400萬美金埋到尾。可能係J Lo自己唔收片酬啦。做乜咁益街坊？賣大包（真係幾大！）醒啲好野比你睇？噢，其實佢本人都係監製之一，可能只收分紅啦。
而我睇完套戲，都係再三回味呢一幕「伊利亞德」