李思捷《今晚睇李》一出，已被網民及傳媒揭破多個照抄位。其實無綫的節目是抄人都不算什麼新聞了，但是好似佢咁，可以只抄其型而完全其精緒真係好難。雖然都好耐無睇TVB ，但係一直都好想好想香港可以有一個這類型的TALK SHOW，現在佢真係有啦，但係又搞到不倫不類，咁究竟點先能成為一個好既Talk Show呢, 唯有寫篇文教精佢點樣搞先啱。
先利申，我只是一個小小的TALK SHOW觀眾，觀賞歷無李思捷有三十年咁勁，只有五年度，由Fallon，Kimmel，Conan，Letterman，Craig Ferguson, Daily Show, Colbert及近年最新的Seth Meyers 都有睇。而李思捷個SHOW，睇左第一集覺得眼很痛，都專登睇埋第二集先寫，俾多一集機會佢。平心而論，雖然第二集在幾個地方都比第一集有進步，不過仍然是要不時轉台跳來跳去才看得完。
單立文說個個Talk Show 的格式都是差不多，沒錯，縱觀美國現時比較出名的幾個Talk Show，格式的確是大同小異的，都是同一個Format：一開始, 先由主持人出場先說幾個諷刺時弊的棟篤笑環節；然後第二部分是一個主持人主持的搞笑部份；再來是嘉賓訪問，多數有兩個。最後有表演嘉賓，可能是歌手，可能是棟篤笑，甚至係煮食，或者係將一小段既舞台劇搬上來。所以說格式不能說抄這一點，我是認同的。
但《今晚睇李》最失敗既地方，不在於佢抄，而係在於D笑話完全唔好笑。在第一個環節的棟篤笑環節，唔敢諷刺時弊，明明香港每日咁多好笑野發生，如蘇文大學呀，龍蝦呀咁，都唔用，嘥晒。第二集時用了一點自嘲，但都係唔係好夠好笑。其實自黃子華演出棟篤笑以來，香港的觀眾應該都對棟篤笑有所認識，所以如果佢話驚香港觀眾唔習慣，又唔太合理。無計，一來佢係預先錄影既節目，所以唔可以用最新既時事標題來講笑。二來，在這個有名你叫CCTVB的地方，連新聞部都要被審查時，這種小節目更加唔敢得罪人。
而那些所謂趣劇，更加係返返去８０年代既王晶既笑話。本來搵單立文做返候賽恩係有Ｄ睇頭的，但可惜捉到鹿唔識脫角，用左Ｄ低能笑話，觀眾連恥笑佢都唔識笑，最後個劇完全唔知想點。第二集時一開始時扮去洪永城屋企那段亦是拍得又長又不好笑。反而搵張繼聰半驚喜登場唱歌，算是有一點舖排。
至於訪問方面，叫得做Talk Show，叫你Talk 個笑話又唔多得了, 訪問嘉賓是否就要做得好少少? 在第一集訪問吳君如和第二集訪問毛舜筠時都犯上同樣問題，就訪問流於《今日ＶＩＰ》模式，變左純粹的廣告環節。係，外國的TALK SHOW嘉賓都係多數為左宣傳電影或電視劇才上這類節目，但人家多數有預先設定對談的內容，揀一Ｄ嘉賓比較有趣既話題先講，宣傳部份可能只佔整個訪問一成時間。雖然中途李思捷有嘗試引出一些好笑D既話題，或用些趣劇來帶起氣氛，但覺得和嘉賓的配合不太夠，人家都不知道如何回應才好。如果李思捷自問夠急才，可以效法其中一個筆者最喜愛的Talk Show Host Craig Ferguson咁和嘉賓不設防地隨便吹水。但要做到仍要保持有趣，一來他自已要是很好的訪問者，二來香港的嘉賓要習慣這種形式的訪問，開放一點暢所欲言，不要那麼官腔。
而那些遊戲環節，大部份都是抄Jimmy Fallon 的，個人認為這些遊戲的存在目的是為了「攝」時間為主，其實存在價值不大，尤其是大婆台早已充滿很多不同形式的遊戲節目。全個show最精彩的部份，無論是第一集或第二集，都是最後的表演環節，總叫做沒有之前整個節目的尷尬氣氛。
個人覺得佢並唔係為左純粹自high，而係真係有心做好個節目的話，可以從以下幾方面著手：
一， 和觀眾的互動做好一些，炒作下氣氛，第二集時明顯比第一集好，但都要再和觀眾多些互動。
二， 好好的去研究下如何搞笑。或者請返一班喜劇作家來幫手（李力持，林超榮就不要了，考慮下高登仔？不過高登仔未必會去CCTVB做）
三， 加多一Ｄ自已的創意，不要整個節目都抄人。
四， 直頭換過個台做。最好換埋主持人，所有人及成個set。
在我看來，一個有級數的Late Night Talk Show係大城市的象徵來的，如果能有一個吸引到國際明星的Late Night Talk Show有助提升國際地位，增進文化交流。《今晚睇李》雖然不是第一個香港的Late Night Talk Show，但總算是同類型的第一個，踏出了第一步，希望會有多一點同類型節目百花齊放。