琴日同班Friend食飯聚舊，口痕痕就拎左李心潔老公偷食單野出黎講下，點知成班女仔瞪大對眼，一臉驚訝咁望住我，原來佢地仲未知發生咩事。各人都紛紛打開蘋果動新聞係到睇偷食單野發展成點，之後就開始議論紛紛，開行引擎怒屌彭順依個世紀賤男，理由不外乎「李心潔咁好咁正點解仲要出去偷食」。
食完飯後，行去車站期間，我見到我個Friend個樣一臉不安咁望住手機，我裝一裝佢睇緊咩，原來仲睇緊偷食單野，我忍唔住問:「你仲睇依單野？你識彭順定係李心潔？」
佢一臉迷惑對我講：「作為女人，真係覺得李心潔好慘。」
我隨口就講句：「我都覺得佢慘，不過男人就係咁架喇，唔係咩出奇事。」
之後佢繼續專注返部手機到，然後喃喃自語：「好再我男朋友唔會偷食。」
於是我就問：「如果有一日你發現你老公去左偷食，你會點？」
佢好緊張咁講：「嘩！我一定崩潰呀！我接受唔到佢出面有女人！」
「咁之後點？咁崩潰完之後呢？」
佢一臉鄂然，然後支吾以對：「咁......咪......唉唔知！」
女人就係咁，永遠都唔想提及「離婚」依兩個字，即使另一伴叫雞又好，偷食包二奶又好，都只能夠自己關埋房門縮埋床角大喊一埸，但唔想改變依段婚姻，又或者放唔低，最後只能夠「原諒對方」隻眼開隻眼閉，無視自古留傳落黎「一次不忠百次不用」，繼續維繫住依段出現裂痕嘅夫妻關係，因為佢地都意識到失去另一伴個段傷痛隨時比知道對方偷食更大，既輸唔起，亦承受不到。
依個朋友同左佢男朋友拍左六年拖，我地身邊嘅人都知佢地結婚都係時間問題，喂大佬，拍左六年拖唔結婚？
有時侯個女仔同我呻：「如果依家個男朋友唔要佢，佢都唔知點算好。」
想起當年依個女仔大把人追大把選擇，最後揀左一個無名小子，日子漸久，無名小子價值上升，變成有料男人，關係就反客為主，以往男方擔心女方唔要佢，變成女方擔心男方唔要佢，畢竟六年女人最寶貴青春都比左依個男人，如果埋門一腳撻Q，邊個賠返青春比佢？
嗰刻突然覺得女人揀終生伴侶就好似賭博一樣，買錯左落錯注，隨時抱憾終生，結婚唔同拍拖，唔係話散就散，手尾長又影響大，輸嘅唔只係婚姻，仲有青春好多好多等等。反而男人好似無咩所謂咁，亦都無咩人會放大男人婚姻失敗依一點，只要事業有成，仲有大把選擇。
特別係有名有利嘅男人，條件好左自然選擇多左，社交圈子大左自然誘惑多左，好似黃子華講笑講過男人最慘就係：「發達，升官，陪老婆！」「我發達返黎陪你睇大長今！？我發達梗係捉大長今黎陪我喇！」
所以即使男方偷食又好咩都好，女方都只能夠「默默承受，原諒對方」。求其數都數到，陳浩民影到攪陳嘉桓，之後仲同老婆出黎開記招，最後又係無事，倪震被爆偷食......最後周慧敏原諒佢之餘仲結埋婚，最後又係無事。
當大家以為李心潔一定狠狠咁飛左彭順依個賤男，但最後又係點？
咪又係無事。
不過寧教人打仔，莫叫人分妻，家家有本難唸的經，一家唔知一家事，好多野只有當事人先知同最清楚，我地只能夠八掛下，作為茶餘飯話題就算，無需深究。
但作為男人，當一個女人付出咁多青春時間係你身上，唔該做返個有腰骨嘅男人，好好照顧對方，既然結婚，就要做個好老公，唔好違背當日婚禮上的承諾，讓女人覺得當日「落注投資」係你身上係依世人最正確嘅決定。