《大師兄：洗腦課程（一）》
有追開我寫嘢嘅朋友都應該知道邊位係大師兄（詳情請參考：《人生最怕遇到但我一定會遇到嘅五種人》）
時間返到去當日我跟大師兄入左呃人課程中心到做野個期。
正所謂，做銷售最緊要咩？
梗係正能量啦！
一個搵幾多錢嘅人都會話自己唔鍾意返工，唯獨是做保險呢類嘅朋友先至會「強調」自己有幾撚鍾意份工。
「今日我又幫到一位客人啦，人地得益自己又開心，Fighting!!!」
呢啲肉麻說話唔係鬼上身，點講出口？
然而呢種事發生係大師兄身上有如淨心，私煙陪你玩３Ｐ － 恐怖到不得了。
【起源】
公司啲人梗係講，呢個領導課程會帶領你成功啦。
而第一個帶菌者就係叫呀星嗰蛋散。
呀星嗰日叫齊哂全公司啲人去睇佢嘅畢業典禮。
地點係新蒲崗一間舊式商場內，在場幾十人都係等緊自己嘅朋友畢業典禮。
由於受到指示，我地唔可以發出任何聲浪影響佢地。
進入場嘅一刻，我真係嚇親！
當時場內環境幽暗，只有少數燈光，紅色布幕，配上催淚嘅音樂（播住「古巨基－愛得太遲」）幾十人全部合埋眼，手拖手圍成一個圓形，台上司儀就用佢把感性嘅顏聯武聲線帶動在場嘅學員進入狀態：
「我地嘅人生有幾咁短暫，你最愛嘅人同最鍚你永遠都會係身邊到支持你……」
「有冇幻想過，向你最愛嘅人講句我愛你，同你父母送上一個親吻？」
「我地會比你勇氣同支持」
呢一刻，已經有唔少學員忍唔住係到喊，而呢個氣氛同時亦都影響到我同其他一眾黎參加畢業典禮嘅人都進入埋情緒。
當司儀叫群眾開眼一刻，學員見到眼前所有親朋好友都出現。全部人相擁而泣，個種情況絕對唔係普遍人都可以接受到。
人嘅情緒係會由別人所影響，當時眼濕濕嘅除左我，仲有大師兄。
【成魔之路】
無耐大師兄梗係報名參加，仲拉大隊咁叫我地玩，我梗係一口拒絕！
你老味，玩個咁嘅野要成三四皮，我個陣銀行戶口得個千幾蚊咋。
大：你想唔想成功先？
吹：想
大：你知道呢樣野對你有好處，你係咪應該盡你所能去學先？
吹：係
大：咁你考慮乜？
吹：錢
大：你知道呢樣係有用架，咁你咪借住錢先囉。
吹：咁你唔借比我？
（呢句野大家記得，將會出現好多次）
好彩我個陣都未痴得哂，但大師兄已經癲癲地，當時佢嘅收入唔會比我好得多，但佢竟然夠薑借人錢去參加埋呢種課程。
當然佢立場係覺得銷售人員心態好緊要，所以由內至外咁去訓練自己先係最佳良方。
事實係，只要大師兄報班，呀星條仆街就有錢賺，呀星根本就係公司到搞緊內銷！言而，有咩銷售係強得過，你自己心甘命抵咁去買？
當日個畢業典禮，根本係一個傳銷陷阱。
買完傳銷啲貨，你至多無左啲錢；你買傳銷啲貨仲哄人買，你連朋友都無鳩埋。
（下集：將會講述大師兄成魔後嘅心路歷程，然後我會比人叫去參加體驗班，親身感受呢班人渣嘅無恥同瘋狂！）
如果喜歡吹水皇的文，歡迎大家like & share
多謝大家繼續支持