每個男仔都有幼想過自己係超人：飛得、打得、睇得。超人十項全能，自保冇問題，保護女朋友易過借火，唔覺意仲可以救埋全世界。但俗語都話做人千祈唔好睇小自己，當你生於香港又可以長大成人，去到而家十幾廿歲都仲行得走得的話，其實你都已經算係一個超人。點解咁講？好簡單：一個正常人係香港生活會癲架。
有人話香港後生唔挨得熱，夏天果三十幾度就個個手持一把芭蕉扇。唔知點解怕熱會變左無能既一種代表，只要你一話「好熱」就自然話有人你唔挨得苦。就算四十度都好啦，老人家都會同你講「心靜自然涼」，你覺熱只因為你有雜念。你話出到街個個都出哂汗唔係得你一個熱，佢地又會話「大人返工點同呢？」人地做野好辛苦芸芸，但明明香港辦公室都係有冷氣，照道理你返工幾多野做都好同熱唔熱係冇關係。不過就算有依個疑問你都唔會問出口，因為你知道只會得出「駁嘴！」依個答案。
其實係香港做個「有用既後生仔」何止要唔怕熱，首先由小學仲係細路仔果陣你就要學七種樂器七國語言七種興趣去多元發展為日後做好準備，雖然明明你冇諗過做音樂家翻譯員。但係學咁多野既同時又要讀好書，最好科科九十分以上，就算一日廿四小時唔瞓都好我都唔知點樣先可以樣樣完美ＨＡＮＤＬＥ。六年小學生涯好辛苦咩？唔緊要，上到中學你既興趣班會大大減少，轉移去一大堆雞精補習班。中英數科學生物物理通識乜都補一餐，補完返屋企又要鎖埋自己做功課溫書，特別係中五六果兩年你有可能覺得自己同個隱青差唔多。你睇電視咩？你老母實問你溫哂書未。你答未溫哂佢會話你，你話溫哂佢都會話你：咁點解唔溫下一科／課／年嘅野？你想同佢講你睇新聞就係想增進下通識了解下時間，但佢覺得你一開電視就一定係睇ＲＵＮＮＩＮＧ ＭＡＮ之類「冇營養」既節目。你知你點講都冇用，所以你又死死氣咁返埋房。到最後你通識唔合格又問你「點解會咁嘅？」，你又唔好意思同佢講而家連新既警務署長係乜水都唔知又點可能合格。
好啦，我地唔講學業依個咁令人煩惱既問題，如果你咁好彩搵到個男女朋友的話你又要面對多一件事：小學果陣都已經唔夠用嘅時間而家變得更加唔夠。溫書果陣比男女朋友怪你唔抽時間陪佢，拍拖果陣比屋企親戚怪你掛住去玩無心向學。唔好問我點解佢地永遠都淨係睇到差果一邊，依一點睇怕係人類既天性。你抽時間拍拖，對方又想同你升同一間大學要你努力啲溫書，到你溫書果陣佢又話佢好悶不如今晚出黎睇戲。好混亂？唔知佢想點？其實佢既要求好簡單，就係要你係一個超人，拍拖之餘又溫到書，溫書之餘又可以成日出去玩。唔好以為依個現像去到讀完書做嘢就會解決，到時就係會變成又要你儲錢計畫未來但又三五不時要你去迪士尼荔園食自肋餐買禮物去日本韓國歐洲但明明你人工得果一萬蚊。
以上既生活基本唔係一個人可以做得到，單單係點樣「拍拖同時溫書，溫書同時拍拖」同「洗錢之餘儲到錢，儲錢之餘洗到錢」已經係千古難題。你既父母、親戚、男女朋友對你都有住好高嘅要求，情況就好似全世界人類企係原地等你抬起架三萬尺跌緊落黎既飛機然後打敗一堆軍方冇行動而又入侵緊地球既外星人同時你又要同女朋友結婚生仔再打擊埋所有惡勢力但只係得三個鐘時間比你咁樣。
我淨係坐係度諗下都已經流哂大汗，然後我又好似隱約聽到有人話而家啲後生真係冇用咁樣。係香港想做個後生，唔係咁易架。
一個讚好，是對我的一點支持。
如果想分享給其他朋友的話，請標明出處並附上專頁網址。
https://www.facebook.com/MaoYanDe