以下呢段回憶，相信淨係得由細睇有線睇到大嘅九十後先會有共鳴，但呢啲共鳴比起其他人更特別。假如我個腦有個《玩轉腦朋友》嘅大腦總部，一定會有「有線兒童台島」，真㗎！
對部分有睇有線嘅九十後嚟講，以前嘅有線兒童台，簡直係TVB以外另一難忘回憶。除咗節目好、卡通掂、主持亦都好鼎盛，兼且比起TVB兒童節目更好嘅係，可以即時打電話玩遊戲，贏咗可以攞獎品。
有線兒童節目，真係比起《閃電傳真機》同《放學ICU》等節目，更容易被遺忘，因為佢哋啲名改得幾差吓。當中出名嘅只有《A級世界》；《IQ非典型》擺明學TVB根據時下流行話題去改呢個名；之後乜嘢《智趣大本營》、《開心之城》等等真係無人識咁制；後尾連影都無，只係流水式播卡通。
雖然嗰啲節目無人識，但裡面主持人，相信有睇過有線嘅無理由唔識。TVB有譚玉瑛姐姐，而有線早期就有Jim哥哥（詹瑞文）、細龜（黃一山），兩位主持風格都好盞鬼，演技都一流，畀到我難忘印象。
而後期一啲嘅唔少得Amen（區焯文），即係年頭執導三級片《鴨王》嗰位，佢同拍檔阿Bean（劉蜀永）一樣，都係樣貌平平又老積咗啲，但佢哋坐鎮咗幾年，好難記唔到。
提起兒童台，就當然講埋卡通啦，我可以講，兒童台部分嘅卡通，比TVB嘅同期卡通更加出色。尤其係千禧年代中期，當TVB卡通愈出愈無特色嘅時候（而家出咗幾可愛嘅妖怪貓，好似多人睇），有線卡通內容上跑贏前者。當時風靡全港的Keroro同《魔法小米路》，最初係由有線引入嘅。唔知以下主題曲，你記唔記分別屬於邊部卡通？（因系統節限，好似無得插入影片落文章裡面，想知嘅話請按以下連結。）
「一起唱K 一起拍手就跳跳舞
打一個Game E一個mail 大打乞嚏
魔法大王毛病太多 乞嚏打幾個
乞嚏多唱首乞嚏歌
魔王！魔王！消防局燃燒
走啦走啦 不得了」
「It’s show time
Doli Doli請即變身
魔法魔法
東京有貓喵啊
齊合作"Ko He"啦啊
可愛啊」
「小吉 每樣食Ｄ
燈膽貨車 拖鞋廁紙
點知 博士自私 事事懷疑
小吉會咬 山吹老師 嘩∼」
「Kero Kero Kero
將軍需戰鬥
嚟到就要被屈住炒
個樣最無型 又似青蛙
成日想出招攻擊 結果訓咗覺」
關於兒童台嘅嘢，要講哂嘅話，真係成匹布咁長，先講到呢度。