早前看到一段紅爆的短片，一段關於「世界上最辛苦的工作」的視像應徵短片，話說美國波士頓一間公司，刊登了一則招聘「營運總監」廣告，面試苛刻的條件聽到班應徵者O晒嘴，究竟是甚麼工作要一星期返135小時、又要站又要彎腰、又無假期、仲要識交際、談判、醫療、烹飪、投資……，而最恐怖是沒有人工的。
既窩心又反高潮的答案——媽媽。就是媽媽，係喎，原來媽媽由你出世開始就身兼數職辛辛苦苦把你養育成人，想真一點，她們的確是很偉大。今日是一年一度的母親節，是一個好機會讓大家答謝母親、念念親恩。「唔係母親節都應該孝順㗎啦」，對，但母親節就像是我「孝順」的中途加油站，老實說，香港地搵食艱難，老竇老母都要做嘢，親恩的偉大好像比古時較難體現，而我亦是典型的「非孝順仔」，即不會頂撞辱罵，但問候關心同樣缺乏，形同陌路人？但又熟悉一點，正因為太熟悉，有些不能改變的事實令這個關係趨於「穩定」，即是維持疏離。加上文化衝擊，西方的自由開放、中華民族的內歛守舊，導致連在家中也是各人自掃門前雪，溝通不足，誤會滾存，對母親的愛自然難以訴諸於口，更也許因為對「母親的愛」這個概念性的東西還是十分模糊。
唉，這恐怕是結構性問題。但我突然想起，為何我能夠對身邊好友甚至普通朋友都很好，但對自己阿媽卻那麼差呢。對了，不如試下改變，當她是普通朋友，只是名字叫「媽咪」，那麼「喂，得唔得閒食個飯呀」、「喂，不如傾下偈丫」、「喂，我好鍾意你呀」係唔係變得易開口呢。
轉載自《新報》