面對呢種文化現象的批評，好多人第一個反擊點就是：「車，我鐘意呀，關你X事呀？」呢個講法背後兼持的是「文化相對論」：「某一個文化的行為，不應該藉由其他的文化觀點來判斷；只有從該文化本身的標準及價值出發，才能夠了解該文化。（註1）」
真可惜，此言實差矣。如果每個文化都不能夠被批評、修正，咁世界就好大鑊－用個極端之例，食人族食人我地唔可以批評、因為佢地食人食得開心愉快；又或者清朝女子扎腳我地都唔可以批評、因為佢地扎得心甘情願。係咪咁先？！如果唔係，咁點解「狗衝排隊食食食打卡呃Like」我就唔可以批評？所以，單就「個人喜好」、「文化相對」，而認為其他人不能予之批評的這一個說法，是站不住腳的。如果呢個文化本身就有問題，我們就需要去正視－唔係咁咩？
排隊也要有價值，「珍珠奶茶」值唔值？
點解排隊要排得有價值？又是同首文的「時間珍貴論」有關。當時間已經咁珍貴，你一旦決定要排隊之後的機會成本是幾咁高時，排隊的成果就成為排唔排隊的決定性因素。如果你等咁長時間，是為左追求更高價值的野（例如等幾日，可以衝入立法會請願之類？），我仍然覺得好OK。但如果我地將咁寶貴的時間用黎排隊，只是為左一D生物層價值的野（e.g. 食物），咁就真係好低質－所以顯然地，「狗衝排隊食食食打卡呃Like」不止為了解決生理需求，而是存在其他原因。
「珍珠奶茶」已不單是「珍珠奶茶」
本來排隊是為「食」，但最後排隊竟然唔係淨是為「食」？無錯。如今「排到一杯珍珠奶茶」已成為同儕之間炫耀的話題。「珍珠奶茶」已不單是「珍珠奶茶」，它顯示的是「潮流」、「品味」、「堅持」、「我有你無」、「身份認同」、甚至「文化歸屬感」。呢D價值的產生，大大增加物件本身的珍貴與價值感；「打卡呃Like」呢類「售後活動」，亦賦予「購買珍珠奶茶」以外更多的價值，才是人們汲汲於所追求的。但可悲的是，我們竟然是用呢個方法，去「追求身份認同」，甚至是「文化歸屬感」？要做到呢D野，有大把方法，但香港人竟然要用一杯珍珠奶茶去解決？
排隊的象徵意義
有讀者提出，排隊本身就是「令空虛生命變得真實，見著一班人一起排隊，感覺在做一件偉大的事」，實在太有意思－透過排隊，感覺好似一大班人做緊好偉大的事（但事實明明就唔是好偉大）；而做完後，由於你「以為自己做完一件好偉大的事」，所以你達到「自我滿足」、甚至陶醉於此，而呢種感覺，亦促使你下星期又去排過隊－那些曾經排過（現在被我講中而恨得牙癢癢）的朋友們，難道你不是這樣想嗎？！
講左咁耐，我想證立一點，就是呢種「狗衝排隊食食食打卡呃Like」，真的是一種「極無營養文化」。它僅能滿足我們生理需求之餘、更令我們用畸型的方法，追求無營養的「價值」（例如以為自己有「品味」、「堅持」等）；而進行此行為所付出的成本（即時間），卻遠遠大於其價值。偶而一次半次，其實無所謂，但風行如此，倒是我們該要反省的時候了吧？
參考：
註1：維基百科－文化相對論