要談「無營養文化」呢個現象，第一個排頭位的，當以「狗衝排隊食食食」及「打卡呃Like」呢點莫屬。我之前都有寫過單獨關於「喜茶」的文，現以「狗衝排隊食食食」及「打卡呃Like」一同討論，再撰文於此。原文有興趣者可睇番。
近幾年，我發覺香港人越發鐘意排隊。由以前「邊間野好食就去排隊」到到「演唱會撲飛又去排隊」、連買個月餅都排一餐隊；排隊的時間亦從以前10-15分鐘，大幅增加至動輒一粒鐘，而最近有日本Pancake店於銅鑼灣開幕，竟要排 3 粒鐘先食到。而今年喜茶的登陸，亦成功讓呢種排隊風潮發揮到了極致。
自從今年由自由工作者身份轉為全職工作（即使我已工作多年...哈），我尤其感受到時間的寶貴—即使我幾準時收工都好，香港地一星期 44 粒鐘工作都是最低消費。放工之後無耐就天黑，時間根本就不等人地一分一秒的溜走—可以的話，我幾想每日都放假，做自己鐘意做的野。但，大家時間咁寶貴之下，卻竟然有一大班笨蛋、為左跟風、排隊排一兩粒鐘都在所不惜。即係咁，排隊還排隊，都睇下果樣野既價值，值唔值得你排啦。為左杯二三十蚊的野飲／百幾蚊的 Pancake ，居然有大把人甘願排一兩粒鐘甚至三粒鐘。雖則話野食唔係好貴，但係你嘅時間一樣係金錢，講緊香港最低工資都 $34.5 啦；商家要人等咁耐，同樣嘥緊我地嘅錢，咁點解大家又願意畀佢「嘥錢」呢？好明顯大家都係跟風啫。
利申，本人都飲過一次喜茶，當時在強國等左大半粒鐘到，試過亦唔覺得好味到曉飛—咁點解我飲？因為老公想試囉，結果相都無影張，卡都無打。其實我都知喜茶要等好耐，但我總是覺得成件事好有問題，既然要人等咁耐，點解唔開 D 分店、或者在沖泡方面加快速度？商人總是唔想得罪顧客，賺更多的錢，點解佢仍然要人等咁耐？呢 D 好明顯亦是市場策略之一。
而最教我覺得神奇的，是大家竟然將「排隊排好耐」、「買到杯珍珠奶茶」同「好叻好勁好潮」掛勾（我心諗，你叻乜野呀？腳骨力呀？）。出現左呢一種預咗要飲一杯茶、動輒排隊一個鐘以上，然後重點是打卡呃Like的風潮，已經完全感受到香港人的文化劣質化—香港人曾被英國統治，接受的那種英式文化素養與 Dignity 仿如蕩然無存（但我亦絕非祟英，只是就事論事，英國文化素養總比起強國後文革時代的禮崩樂壞好吧？！），剩下的只是一班港女（甚至港男）狗衝排隊，為的只是一杯無無謂謂的野飲／野食、為左Attention seeking、為左IG留倩影...呵，原來係咁。
當我哋喺度鬧啲香港廢老對香港民主冇付出，我真係想問，新嘅一代呢種生活態度又有幾可以令到社會改變？當社會問題多如鴻毛，高鐵爭議、土地大辯論、沙中線沉降、中國假疫苗風暴等等在在影響民生需要，呢啲嘢卻完全提唔起公共關注，反倒係一杯完全無公共性可言的「黑糖珍珠鮮奶」、一間「喜茶」、一間「日本Pancake」、就竟然可以令到新一代狗衝，成為網絡熱話，呢啲又係咩質素？
而我曾經寫過文章，談及Why Not Both的問題。即係點解我地唔可以既追捧喜茶，又關注時事呢？最後我得出的結論是，很簡單，因為人的時間很有限，你追捧喜茶，排隊排一兩粒鐘，呢件事已經Consume你好多精神時間，咁你仲邊有時間理其他更有價值（Sorry 我真係覺得關注社會議題的價值比起排一杯野飲的價值高...）的野？而你大可死撐話「我排隊果陣其實係睇緊殷海光《人生的意義》呀你識條毛啦？」，但是會好好利用排隊一粒鐘做「較有意義」的野的又有幾多？有幾多是碌下FB打下CandyCrush傾下計又過左？講到尾，香港人呢種盲目追捧認威、以為自己排到隊好叻叻豬、打卡呃Like，表面風光實際膚淺嘅心態與態度，呢個先係有問題。
這個問題，其實有點複離，且看下回分解。