先「利申」本人完全沒有看韓劇的興趣或習慣，但最近在交友網站看到有一女性說：「我要嫁給外星人」，之後她男友則回應：「咁我將你丟去那星。」諸如此類的古怪論調，然後我才知道港女們看不起港男到一個地步直頭要去找「外星人」，原來這全因一套韓劇。
還記得我們當年看日劇看《同一屋簷下》、聽J-pop聽椎名林檎；現在看韓劇看《來自星星的你》、聽K-pop聽泫雅，噢，是睇泫雅。以前日牌就等於潮牌，甚麼Wtap、Visvim，但現在連BAPE的紐約倫敦店都逐一倒閉，反而韓國的Juun.J和Wooyoungmi等卻進軍巴黎。以前買電器是Made in Japan的好，現在通街都是Samsung手機。
難怪不少日本人都討厭韓國文化，認為韓國今日的成功是抄襲日本的文化，所以幾年前有本好hit的漫畫《嫌韓流》，全面掀動反韓情緒。不過，風水輪流轉，日本的漢字、和服等豈又不是參考中華文化呢？
不過，我個人覺得韓風真係好擾民，套套喊苦喊忽慘情就當作劇集；個個五顏六色七三分界就當作明星；首首一式一樣、幾個膠公仔跳艷舞就當作音樂，既然有「驅蝗」行動，唔差在整多個「驅韓」行動吧。有女仔為韓劇跟男友分手，我也身受其害，女友日日煲劇唔出街當然唔少得，仲將原本我同佢合照的手機桌面，換成一大個金秀賢。我跟她說：「既然你咁鍾意韓國，不如你學佢整埋容啦。」跟住佢回應我一句不知是韓文還是粗口的「Saranghae！」
轉載自新報