午飯時間，在中環嘉咸街閒逛，商販主婦打工仔，各式各樣的小市民，在露天街市熙來攘往，生氣盎然。驚嘆中環還有小市民可棲身之地。走到盡處，看到一間茶餐廳門口掛著紅底黑字毛筆標語：「街市未落成，商戶不遷出」。原來，重建巨輪已壓在頭頂。
在結志街營業十數年的鈞樂茶餐廳老闆娘麗姐表示，受重建影響，即將要在本月底遷出，否則不獲退還押金（相約於收購後直至遷出日期間全數租金的一半）。重建收購以致租金飛升，市建局給予的賠償根本不足以在同區重置相等大小的食肆鋪位。經營飲食的他們亦不獲安排「無縫銜接」至「新零售大樓」（即街市）。「咩叫唔合資格呀？我地都係呢條街既一份子！講黎講去都話合約精神，簽左就要走。你夠話今年起好街市啦，宜家影都無！」
(圍板上的夢幻插圖，反映政府對街市有哪門子的想像呢？）
我們要怎樣的街市？
根據上年度中西區區議會文件，市建局預計新零售大樓將於本年中竣工，已參加「新鮮食品店商販安排」的商戶遷入後，市建局將會進行清拆工程及展開重建。可是此安排只商用於鮮貨鋪，其他乾貨鋪和食肆則無從選擇。市建局稱新的濕貨街市亦只會有10個鋪位，而受影響的商販最少達36戶。(1)「一個街市，肯定有乾有濕，所謂麻雀雖小，五臟俱全呀嘛！街市都要有熟食架，人地返寫字樓同d普羅大眾都要食架！都唔知佢點規劃既！我地由於無份參與，所以無得講。」麗姐說來氣在心頭。
「傾左喇咩？我唔知喎！上到去開會都趕我走！」
根據2013年的立法會發展事務委員會資料文件第17項，市建局指「商戶已普遍達成協議，同意將地盤A及地盤C內受影響商戶店鋪分五個小區分階段遷出。」 ，又表示「在整個項目的規劃及設計過程中，市建局全面落實了以人為本及可持續發展的理念，充份考慮了受影響居民、商戶及社區意見。」有多充份呢？「有鬼傾呀？一黎就登記喇！佢同大聯盟(2)開既所有會，我地一個都無份參加！有次我地上到去都趕返我地落黎呀！佢話喎，你業主未賣，無你份。如果你地係都要入去，我地唯有取消呢個會。嘩，嚴重到咁喎！我地都係受重建影響既，點解我地無權利去聽佢講咩？」
焗住簽，租住先
根據現行賠償政策，市建局成功收回物業後，才有責任賠償給該處租戶。(3)換言之，市建局大條道理撇清收購前因重建對租戶造成損失的責任。去年三月，市建局以《收回土地條例》正式收回鈞樂茶餐廳的業權，並於五月與他們簽定准用協議。而當時老闆娘對於不合資格回遷街市毫不知情：「你所講既條款，我地全部都唔會知。簽既時候無提過，提我就實反對啦！佢淨係計條數俾我地睇，話賠償要扣埋行政費呀手續費呀咁之嘛。」麗姐拍檔表示：「無得唔簽架！唔簽連果少少賠償都無埋，又會俾業主加租！先焗住簽之嘛。」兩年前市建局收購以致整條街地租倍增，麗姐的業主以此為理據要求他們交雙倍租。
搵鋪甚艱難 老伙記生計凍過水
後來得悉即將不獲續租，他們便四出覓鋪，最希望能在附近繼續營業，只是收購後同區鋪位坐地起價。「成條街都九萬幾、十萬，仲未計牌費呢？」麗姐表示，食肆不同其他乾貨鋪，鋪位要符合條例才可「出牌」。「出細牌都要七、八十萬，何況大牌？」（按：大細牌分別在於炒爐和電爐）她慨嘆附近鋪位不是租貴就是不合規格，更曾經搵到去上環，「有朋友在上環開食堂，叫我過去諗住有個照應啦。但係咁辛苦守到班熟客，如果我去左上環，仲要係內街，佢地點會搵到黎？所謂不熟不做嘛。」所以搬鋪等於由零開始。「唉，我已經搵到心灰意冷，最唔想就係個個五十幾、六十歲先黎失業，出到去仲邊有人請呀？做飲食都好辛苦架，一日做足十幾個鐘，做到腳跛都係想自力更生啫，點解咁都唔得？」
漂泊一生 只為一餐安樂茶飯
回溯一生，麗姐靠一雙手養活了一家四口。她住黃大仙，拍檔住元朗，十幾年來日日漂洋過海來中環開檔。「開頭係廣州落黎乜都唔識，先生就介紹我去佢朋友係青山道龍翔大廈既canteen做洗碗。咁佢(拍檔)果時就係青山道做小販，見我老細請part time，就認識左囉。」
多年來也翻起不少風浪，「後尾呢個canteen就無牌，咁就無得做。我養住兩個仔架嘛，我唔食佢地都要食架。」二十年前的事，麗姐說來雲淡風輕：「果時就開始周圍做（飲食），黃大仙我又做過啦，鑽石山又做過。果陣有兩公婆，佢地唔識做，我就包哂。又做水吧、又炒埋野。為左生活無辦法啦。」
麗姐除了抵得諗和捱得，也是個老實人，「果時睇報紙搵工，見到鑽石山地鐵站，以前好多廉屋果度呢，好難請人。佢見到我咁老實咪請囉。」原來她當年人生路不熟，為了第一天上班不遲到，由黃大仙乘地鐵到鑽石山。怎料人家比她還要早，於是她內疚起來便辭職，卻遭店主挽留，又把她拍檔請來，兩人從此拍住上。「佢做走鬼小販，被人拉到咩咁，咪叫埋佢過黎做囉。後期又拆喇嘛鑽石山，度度都拆！」原來十多年前，她們也是被發展巨輪追著趕，直至今日，又再拆到她門前。
「後尾黎到中環，邊度打邊度都未知。呢間鋪上一手果兩兄弟係福建人，係度做起左。佢地嫌呢度太細，所以去第二度做。加上呢度唔俾擺枱呢，抄牌架嘛，好嚴格架！唔同宜家我地就黎無得做嘞，就由得我地擺下啫。咁佢地見到我咁好人，就帶我行哂成個中環。仲話麗姐你識做先好做呀，唔識做會俾人玩架。」麗姐斷不是「識做」的人，只是殷實的小商戶，她甚至自嘲自己只是打工仔，「玩」她的卻不是行家或凍肉商，而是市建局和發展商。
市建勢要賺到盡決不續租 中環18蚊雞脾何處尋？
根據市建局網上公佈的總綱發展藍圖(4)，嘉咸街和結志街一帶將會被發展成高密度住宅、商用大廈、酒店和寫字樓。現時原址合資格回遷的濕貨鋪於三月過後仍繼續營業，即使市建局現時收回鋪位亦不可能展開清拆工程。對此麗姐拍檔慨嘆：「你俾我地繼續租，慰勞下d貧苦大眾同工人階級呀！方圓幾十里最平係我地，出面六十幾七十蚊碟飯，我地賣三十蚊個餐咋！三十蚊？出面淨係食到隻雞脾，我地18蚊就有喇！仲要即叫即整！唔係淨係街坊，國金呀匯豐呀都過黎架！佢宜家好似趕盡殺絕咁！」
准用協議即將屆滿，扎根多年的鋪戶離散各方。原本網絡綿密的社區進一步瓦解，街坊情不再，市民大眾和小商戶搵食只有更艱難。
參考：
1. 市建局違承諾提早拆嘉咸街 商戶「被代表」妥協
2. 只找王國興「幫忙」 大聯盟：工聯會較體貼
3. 結志街商戶抗議市建局政策不公
4. H18總綱發展藍圖