「你有冇見過Mark哥喊？」
呢樣我真係唔知，但我知道，好多時候，去到大叔嘅年紀，就算喊，眼淚都只能流落肚。
公司要裁員，份工危危乎，仔女唔聽話，老婆日鬧夜鬧，睇到鏡入面嘅倒影，會問自己，點解你會搞成咁？當初，你唔係諗住要做乜做乜嘅咩？
現實永遠係令所有大叔招架不住。要是老多幾年，已經上岸，可能少啲嘢煩，見過有個在體育界多年的所謂一哥，機關算盡，居然受人吹捧，這是上一代的命水。可是大叔沒有這福氣，在中間夾心，是黃德斌的泰哥般，下面當你是仆街，上面就當你工具，結果兩面不是人，有眼淚，又如何，躲在廁所，或者沉落海底，才滴得出來。
大叔的兒女未大，仍要努力工作養家，可惜未必個個的另一半都明白；有時為了家庭仆心仆命，反而被認為不夠上進，搵錢不夠多，想搵朋友，又當成爛滾爛玩，最後獨坐在路邊街角，冷風吹醒，渾不知努力半生，所為何事。
大叔心境年輕，但肉體早已老退，跑不動，跳不起，追不到青春少艾，也留不住心上人，在幻想與現實之間，最可靠的伴侶，是八九十年代的電影；有時晚上睡不了，重看又重看，想想當年自己入場睇嘅時候，傲氣比天高，那想過要睇人臉色，還要打恭作揖？
講一大輪廢話，係想話俾大家知，《逆流大叔》，好好睇。吳鎮宇，入型入格；潘燦良，演活大叔；黃德斌，胡子彤，余香凝，胡定欣，都令你更投入戲中；尤其是胡定欣和吳鎮宇的感情線，可惜篇幅太短，因為實在令人唏噓，男的追夢，女的也追夢，戲如人生，成功者笑，最後，如鎮宇般，食下雪條，笑笑便算。
陳詠燊劇本好，拍得也好，節奏明快，笑中有淚，那些港產gag，是會笑出聲那種；張蚊作為美指，阿龍和Carol的相連舊屋精采，眾人的大叔造型也攞滿分，「劇場王子」變成黃淑儀，不容易，吳鎮宇由機師變司機，更加係出神入化，細節如紅綠燈雪條，那些金獅LD，Rubberband的歌曲和配樂，全是香港人的味道；加上在沙田拍的龍舟比賽，令我更添親切感。
套戲，好香港，睇完，沒有自傷自憐，只係更明白，做乜都唔可以玩吓就算，尊嚴，要自己爭取，呢句，咪即係：「我咁做，唔係要話俾人聽我威！而係要話俾人聽，我冇咗嘅野可以親手攞番！」
因為，我哋都係睇《英雄本色》大，呢套戲，係永恒嘅，大叔縱有千般不長進，但那種氣慨，是八九十年代的英雄片而來。去到最後，幾多難關，還是死頂下去。
Mark哥會唔會喊？
我唔知道，我只知道Mark哥唔會死，因為現實迫人，不能死；就算死咗，就改名叫阿Ken，復活再上陣吧。這就是香港大叔，其實，我哋比Mark哥更勁，划完城門河，直頭想划去維港咁滯！就算到最後，只得第三，都記住要珍惜當下，高舉獎盃，睇得起自己，人哋先會睇得起你。
今次呢套戲，亦係一班影圈中人嘅堅持，唔拍合拍片，有人唔收片酬，唔介意形象，增肥爛佬然後做香港人嘅故事；誠意推介，《逆流大叔》，一定要睇；睇完，你會想起身拍手掌！
p.s.：大叔測試，假如你都覺得余香凝好正，仲幻想幾時可以同佢一齊食雪條睇日落，sorry，阿叔，發夢好啦。