長文，因為要講下歷史。史泰龍嘅洛奇第一集講緊係四十幾年前嘅1976，我都未出世。同今集有密切關係嘅第四集（蘇聯佬，我年紀嘅一定明）都講緊三十幾年前1985。所以都有必要快手講下成個系列，因為有啲讀者真係未出世。老嘢們可以回下帶，或者捉下我錯處（雖則集集我都睇過，有個別睇過幾次），或者直接唔睇呢節跳去下面。
洛奇第一集嘅故事，典型美國夢，第一集係套唔多打拳嘅拳擊片。現實史泰龍被人拒絶N次先成功，但堅持自己做男主角（果然有自信），刀仔鋸大樹，一炮而紅嘅故事反而新一代有機會聽過。第一集100萬美金成本，全球收2億（四十幾年前！），能人所不能。叫好叫座，仲係拎奧斯卡最佳電影同導演，留意唔係史泰龍導演，而佢本人男主角及編劇奬就落空。
第二集焦點打黑人阿波羅，現實史泰龍名成利就當然拎埋導演嚟做，成本貴好多倍但票房略低於上集，評價當然亦唔好，乜大獎都冇提名。打後兩集越嚟越商業化，史泰龍繼續導演，評價越嚟越差，但票房極成功。特別係1985年第四集（蘇聯佬！），收3億美金，三十幾年前嘅3億，成個系列最成功。睇今隻前，強烈建議你搵返第四集嚟睇。
去到第五集，卒之全面仆直（呢集又換返第一集嘅導演），票房口碑都仆街，我睇過，真係好撚唔掂。原本以為洛奇系列同史泰龍本人就咁玩完，時為1990年—我懷疑有啲讀者都未出世。
咁多隻洛奇嘅成本同票房，冇調整通脹
16年後，轉眼去到2006年，史泰龍又嚟過，一把年紀自編自導自演添。大家除咗心諗「唔好啦掛」外，亦有不少係抱住「睇你點出醜」嘅心態入場。舒琪（唔係林立慧嘅舒淇）當年寫過，佢都有咁諗，但睇完套戲大家應該覺得慚愧。2006年呢套Rocky Balboa（冇再叫第六集），評價相當好，票房亦ok，史泰龍得以鹹魚翻生。
咁多集洛奇嘅評價，留意第四集好低分，但好收得
到之後2015年嘅Creed（所謂第七集），你見戲名都換埋，條線去咗第二邊。講同洛奇亦師亦敵（好短期）亦友嘅阿波羅（Creed係阿波羅嘅姓）嗰邊。非官方統計，阿波羅畀蘇聯佬打死嘅第四集，咁多年都係最多人討論嘅一集。雖則評價認真麻麻，但觀眾鍾意，特別係外國觀眾。同我咁上下年紀嘅，應該有老豆帶入戲院嘅回憶，因為當年香港都好收得。第四集當時仲係美蘇冷戰嘅1985年，講蘇聯佬（現實係瑞典佬，都話冷戰，點真係搵件蘇聯佬？）友賽打死阿波羅，洛奇去復仇，打低但冇打死蘇聯佬，最後蘇聯觀眾幹部都欣賞美國。講就大愛，實則係你都要佩服我，美國萬歲，但唔緊要，觀眾受。去到Creed，講阿波羅有個私生子（小阿波羅），搵返洛奇做教練。呢條橋其實唔錯，加上當時仲係奧巴馬，荷里活仲係左膠（其實一直都係），評價好好，票房都OK。
勉強盡快講完成個洛奇系列，都係嗰句，第四集蘇聯佬係必睇嘅，可以嘅話睇埋Creed，再可以嘅話（頂！）睇埋第三集，應該就夠你入場睇Creed II，真係冇時間都盡量睇第四集吧。因為真係幾關鍵，至少我最初咁以為。
戲，其實係唔得嘅，我知評價好，但我主觀覺得幾呵欠。係真係畀我呢啲廢老懷下舊見下舊朋友咁，同埋同後生女（結果我睇嗰場得我一個人，左手同右手講）講下當年嗰啲先係戲。
Creed II同Creed I 關係反而唔係最大，好重要講三次，最大關係係第四集。蘇聯佬打死咗Creed I & II主角小阿波羅個老豆大阿波羅嘛，而家到蘇聯佬個仔蘇聯仔（定俄羅斯仔／烏克蘭仔？連蘇聯都冇埋，你諗下幾多年前）出嚟。小阿波羅復仇？又唔係喎，係蘇聯仔復仇，挑戰小阿波羅，因為佢係洛奇徒弟嘛，洛奇打低佢老豆。原諒我bad taste，但我即時係諗起甘小文嘅經典對聯。四十年幾年前我老豆打死你老豆，今日到我嚟啦。
第四集嘅蘇聯佬在打死大阿波羅後嘅經典名詞
套戲開頭就話你知，成王敗寇，我諗起嘅係黃子華嘅名句：你個海景無敵，我個海景唔使出嚟行啦？洛奇名成利就，但另一邊廂蘇聯佬當然無人觸摸似廢墟。由國家英雄變為國家之恥，生活潦到，老婆（第四集有出場！）走佬，唯一希望得返個仔—就係要訓練佢成材，拎返當年失去咗嘅嘢。之後走嚟美國公開挑戰小阿波羅，去埋洛奇間餐廳，我打死你老友，我個仔一樣打低你徒弟。洛奇話，阿叔，幾廿年前嘅事啦。蘇聯佬話，你快活就梗係咁，但對我嚟講好似昨日嘅事咋！哇。聽落幾好，但呢度已經係高潮，打後所有發展，你都估到。
第三集的 Clubber Lang
另一邊嘅小阿波羅，新科拳王，有名有利，玩結婚玩生仔，好不得意。睇到呢度老觀眾會知道—咪即係第三集咯。所以叫你有時間睇埋第三集。第三集故事同今集無關，但主題相似，講洛奇（第二集）打低阿波羅後做拳王。好啦，名成利就，舒服啦，住大屋做明星啦，疏懶啦。另一邊有個黑人Clubber Lang （Mr. T ），想上位，想贏，有飢餓感，有爭勝心。大約你估到當然係打到洛奇稀巴爛，但到結尾又係洛奇贏返。呢集好適合大家在人生在職場對號入座，特別係我等撈得十幾廿年嘅，往往就係冇咗嗰種飢餓感爭勝心。算啦，仲細咩，仔細老婆嫰（我冇仔，即係咁講）有樓要供，唔好咁搏啦。舊文都寫過，2018年德國之敗一樣係咁，贏得太多又被人捧上天，冇咗爭勝心，歌詞話齋，So many times it happens too fast You trade your passion for glory，冇咗 Eye of the Tiger（正係第三集嘅主題曲）。
於是Creed II 成套戲嘅發展，你都預計到。小阿波羅當然係輕敵，而且冇咗決心。加上洛奇唔贊成佢接受挑戰，唔肯幫佢，因為唔想佢好似老豆咁死在擂台上（當年洛奇其實有機會掉毛巾幫阿波羅投降，其他人都叫佢咁做。但阿波羅堅決叫佢唔好，所以佢冇做，抱憾終生）。結果當然係小阿波羅唔夠蘇聯仔打，幸好冇死到。然後洛奇叔叔出山重新訓練，夠鐘完場就小阿波羅作客莫斯科反勝，收工。悶唔悶啲？
套戲我睇咗兩次，台灣一次香港一次，睇完都係維持原判。同舊作差太遠太遠了。又或者你可以話我已經唔再係當年嘅小朋友（第四集時我七歲咋，而家四十）。又或者根本咁多年大家對呢啲劇情睇到厭，小學生寫劇本都嫌悶。總係主角受壓星矢畀人打南葛日本畀人入兩球，然後忽然間小宇宙爆發一拳搞掂好勁嘅奸角最後反勝一球咁。你唔講我都知啦，唔通南葛畀人大炒聖鬥士星矢死晒咩，成班復仇者下集咪又走返出嚟。
Creed II最大嘅問題，就係好多應該拍嘅內心戲都冇拍到，套戲唔短，兩個鐘，但唔知去咗邊度。多得科技先進，小阿波羅可以在ipad重溫老豆畀蘇聯佬打死，照計呢種死亡陰影佢揮之不去，但戲入面冇好好咁講，只係洛奇講話蘇聯仔好危險，nothing to lose ，癲狗嚟的，小阿波羅又回一句I am dangerous too，我聽到都幾想笑。
另一樣係，其實小阿波羅大可以唔接受蘇聯仔挑戰（我甚至唔明點解兩個噸位爭咁遠都可以一齊打爭拳王，第四集大阿波羅同蘇聯佬係表演賽，同洛奇應該係私片）。中間人挑撥，講話史上77個拳王，觀眾有幾多個記得？只係得拳王寶座唔夠，要有傳奇事蹟，打低蘇聯仔你就名垂千古。呢度其實幾好發揮，應該講多啲小阿波羅點樣覺得自己身為拳王名不符實，點解要爭取認同
而一如以往，反英雄嘅我，見到小阿波羅畀人打到豬頭咁當然好高興，去到結局就呵欠。呢個係我反社會人格，但你好歹都解我知，點解事隔冇耐，小阿波羅可以由畀人打到斷肋骨爆腎，忽然變得咁勁？就因為洛奇啲乜乜特訓？留意第三集類似嘅大逆轉相對比較合理，講洛奇只係輕敵冇準備，「我打返正常水準就掂」。第四集更加聰明，阿波羅畀人打死，洛奇去報仇。
唯一比較好嘅，反而係蘇聯仔蘇聯佬嗰條線。蘇聯佬在第四集就只係一個冷血禁藥殺人機器，去到呢集頭半都仲係咁，但結局（劇透啦）好關鍵：
一樣係差不多要掉白毛巾。史泰龍當年冇幫大阿波羅掉，直接累死朋友。蘇聯佬表面無情，好似一心只係訓練個仔出嚟幫自己報仇，要在同胞同前妻面前攞威，但去到最後一刻佢選擇掉白毛巾—雖然佢全程係咁鬧個仔，但最後見個仔有危險，都係留得青山在哪怕沒春袋。個仔好自責，但老豆都擁抱佢，冇事嘅冇事嘅，算啦。呢下父子情先係最感人。加上片中亦有講蘇聯仔初次打低小阿波羅做國家英雄，兩父子見返（已改嫁？）嘅老母同啲權貴，當然係白鴿眼見高拜。蘇聯仔好不滿，認為就係呢班人害到老豆咁。蘇聯佬話：但因為我打輸咗，而你唔會。又係父子情。呢兩個角色冇咁表面，就好睇過洛奇嘅師徒情了。
最後可以講下，其實同第四集比，前後三十幾年，世界真係不一樣了。第四集嘅政治意味非常明顯，亦係唯一一集講政治嘅。三十三年後，再冇聽過國家，冇美國旗，冇蘇聯／俄羅斯／烏克蘭旗。大家都係只係為咗自己，呢啲就個人主義壓倒晒意識形態，大家只係為自己，身邊朋友，或者屋企人，再冇「國家」嘅角色。而第四集嘅蘇聯仲係鐵幕國度（當然冇拍實景），去到齊齊唱國歌，不苟言笑，簡陋非常。去到今集呢？你見俄羅斯嘅場館，仲浮誇過美國。資本主義萬歲，個人最重要，國家放一邊，先係今日主題。