今日有一個難題，個垃圾桶腳踏甩骹，幾十蚊貨仔，本應揼咗佢，買過個新嘅算喇，但係，係咪真係幾十蚊嘅事呢？
塑膠喺堆填區，你估要幾耐先至能夠生物降解呢？其實無人知，因為太長，無法實驗證明，所以就有咗個 500 年嘅斷估數字出嚟喇。
如果以500年為例，堆填區要收租嘅話，以呢個垃圾桶嘅體積，年租1蚊都不為過，係咪？ 咁即係雖然垃圾桶購置費係幾十蚊，但係棄置費理論上達500大元！
呢個係一個經濟問題，堆填區係公共資源，濫用冇人會肉赤（除咗將軍澳居民），所以，冇人會諗500蚊嘅棄置成本，大家只會諗幾十蚊嘅購置成本。
當然，加設棄置費係一個解決方法，但係如果真係收500，我諗你會見到通街都係垃圾－－唔係咁多人會咁神心畀錢，索性趁無人見嘅時候，飛啲垃圾出街算喇。如果附加喺購置費上，即係買垃圾桶時已預繳500蚊環保稅，咁又變咗官迫民反－500蚊一個垃圾桶，你想逼死啲基層咩！
如果喺理想國度，真係能夠收足棄置費，而所得金額加上政府津貼，然後分配畀堆填區附近居民，由居民決定用幾貴嘅垃圾處理方法，有剩派錢，咁垃圾問題就有一個理想解決方案，每區按自身取捨，投標堆填區，金額就成為棄置費計算基礎，咁就係一個公平交易。固然堆填區唔使逼死喺將軍澳，而垃圾處理方法亦因有價有市，成為鼓勵創新可能，垃圾產電、垃圾製油，通通都有發揚光大機會。講真，區議會本應係咁用，而唔係要嚟派蛇齋餅糉。
當然，發下夢啫，而且諗深一層，投標堆填區亦會衍生其他問題，譬如，窮區會成為垃圾集中地，而又因為有錢派，亦會惡性循環地吸引更多窮人集中該區，成為貧民陷阱，永不超生，或新界土豪，根本唔在乎該區環境（反正都唔係真係住果度，投票先至義憤填胸高舉原居民身份回鄉），所以屢屢低價出標，只求派錢，冇諗過垃圾處理，咁新界就會變屎坑。
回歸現實，其實有嘢可以做嘅，腳踏甩骹，只因槓桿支撐兩邊小小變形外翹，一張膠紙搞掂咗佢喇，咁495年後我先再諗呢個垃圾處理問題喇。