.jpg)
獨立媒體呢排似乎好靜，原來早排佢地一班編輯同作者走左去退修，入烏溪沙租左兩日度假屋，話要靜靜分析下形勢，諗下獨媒條路應該點行喎。雖然獨媒成員好多都貴人事忙，不過今次都有成廿幾人入左營，除左一眾編輯同作者外，仲有特別搵埋梁文道同羅永生入黎大腦震盪一下。八方向消息人士打聽，發現原來都有唔少諗頭。道長入黎就梗係同大家傾下中港民間交流，話香港人長期以來都係諗住河水井水兩不相犯，但現時身處呢個中港融合大潮流下，都要度下點樣令到民間議題都可以中港連結，例如介紹多啲同香港有關o既中國議題。生哥就同大家討論下獨媒甚至其他新媒體o既定位問題，尤其係喺政改後新局勢之下，新媒體係唔係要更加主動介入社區？生哥話，從反高鐵同反政改兩件事睇黎，社會運動喺論述同組織上面都好薄弱，睇來唔單止獨媒，成個社運界都真係要好好反思。
除左大格局，獨媒組織上都有大動作，有獨媒中人話今次退修營最直接結果就係幫編輯部減磅，本來十幾個編輯有一半決定退出編輯部，包括葉寶琳、陳浩倫、林輝等。八方梗係即刻打聽下係唔係因為有咩不和，但查實係因為好多編輯都覺得自己留左喺編輯部太耐，好似有啲太穩定，需要有大變化先可以令到編輯部同自己有生氣，所以退出編輯部而搵另一啲崗位，例如專注多啲搞影像媒體、媒體教育等等。仲有就係有感 Facebook 越來越興旺，好多討論都喺Facebook 入面失落左，於是就物色左本人社運八方，唔單止會搜集 Facebook 入面有意義o既討論，仲會周圍八下社運圈o既既新消息，等大家喺獨媒都可以天下事。
最後八方仲聽左個笑話，同大家分享。話說獨媒退修營最後一日，大家討論到龍飛鳳舞時，突然有個中年男子拎住部相機走入來，話想影下個營舍喎。大家當然即刻請佢食閉門羹，仲話呢位仁兄唔知係唔係西環員工過來索料，索得仲狼死過社運八方！
圖片來源：香港中華基督教青年會