睇到《召喚老幽靈 向時代討債》文章裡重提兩年前既作品「老港正傳」，首先我口痕，想講幾樣野去回應一下。

想起呢部戲原本既名叫「老左正傳」…其實點解好地地叫「老左正傳」又要改做「老港正傳」呢？，其實叫做「老左」，有何問題？呢個係歷史嘛，既然你地到左今時今日都係被社會普遍稱呼為「老左」，咁又何以見得要自我抹殺「老左」作為香港歷史既其中一小部份呢？

至於，文章中泛指「老港」刻意避開某些對共產黨不利、或對特區政府不利既歷史，不過我反而認為，其實「老港」裡面睇唔到既野，先至正正代表「老港」既心態。

講得再詳細一點吧，其實大家只要細心留意呢班「愛國愛港之士」既社群圈子（如維園阿伯、萬人政黨、三十萬會員工會、最有「公信力」既報紙），多點暸解呢班人既主流心理同敏感神經線，或者大家都會歸納到，呢班「老港」對於一些歷史問題，係以下列所講既作為標準答案，我歸納左幾點，例如：

「六四」=-認為歷史自有公論/黨既大事大非不要碰/我可以好負責任告訴你們，六四根本無死過人/我什麼都不知道（請用普通話讀）
「七一遊行」=搞亂香港！（整體「老港」對七一既評價）/不愛國/漢奸/走狗/賣國賊/洋奴/買辦/工賊（維園阿伯、或曾參與文革人士）
「文革」=勾起曾經參加過紅衛兵人士既敏感神經/中央已經對事件有了定論所以不需再談

從此可見，「老港」既社群根本就係從本質上否認、或避談以上所講既歷史，所以，戲中主角長旺（黃秋生飾）既世界裡面就係無「六四」、「七一遊行」，拍呢個「老港」既導演取材可謂正正反映呢班人既心態，這又何有「自我闀割」之疑？

正如，當日本仲有好多人相信，日本響1937-1945年呢八年係「進入」中國而唔係「侵入」中國果陣，你叫佢地以後拍有關太平洋戰爭電影既取材，要拍一d連自己都否認既歷史？發夢吧。

不過，這種脆弱既「精神自瀆」，到底可以響呢個互聯網資訊發達既世界維持幾耐呢？同樣道理，「愛國愛港」既「老港」們，當你地享受緊政府今日賜與你地既「免費政治午餐」果陣，有無唸過你地今日與政府既利益勾結，到底可以維持幾耐？話「六四無死過人」或「七一遊行係反中亂港」既「老港」們，你地認為呢類無「唯物辯證」理論支持既論點，又可以維持幾耐？