民陣前日開會選副召集人，填補早前孔令瑜退出空缺，但係選選去都選唔到人，因為個個都唔肯做，唯一一個肯做叫做長毛，但會員團體又覺得立法會議員唔適合做民間團體領導，結果副召集人仍然難產。
民陣召集人莊耀洸原本想叫學聯搵個代表做副召集人，點知學聯代表連人影都唔見，團體見到咁情況，梗係要三思係咪選學聯啦！會上又有人唔滿意7.1遊行預備工夫好唔夠，覺得民陣欠缺承擔，有團體重好感歎話：「搞到今時今日咁，唔使北京出手，民陣都散晒啦！」
其實搞到咁地步，八方覺得，民陣領導同成員都有責任！好似前日開會陣，民陣有成員無端端批評長毛反釋法遊行後燒《基本法》係「影響民陣、為成員帶來不安」。八方好唔明白，政府同北京都未出聲話不安，點解你先不安呢？
李八方
蘋果日報 2005-05-12