今次真係後知後覺，唔係蘋果日報2月17日出咗篇《為吸內地客 英百景點徵中文名》都唔知英國旅遊局搞咗個「英国等你来命名」嘅活動，個活動嘅提交同投票徵集期為2015年12月3日至2015年2月11日（或者呢度就係個網站打錯字，2015年12月先開始竟然 2 月截稿？）。不過計佢話2015年3月2日公佈結果，其實今日咩都已經塵埃落定，冇得救。
為求客觀公正，睇報紙嘅報導梗係信住半成先（信佢一成雙目失明嘛），自己返去 Source 度搵資料。由於投票活動已塵埃落定，最高票嘅名稱亦以皇冠標示，於是我花少少時間，將嗰 101 個地名列表整理，結果如下：
101個譯名，由提名、評論、投票都一手由網民包辦，真係未開閘都已經插滿晒死亡Flag。到最後譯名睇到滴曬汗，O曬嘴，應該都可以話預計之中。網民性格，簡單而言就係「講就凶狠，做就斯文」。投票畀人用網名登記，唔需要網絡實名制，個個籬埋響屏幕鍵盤後面，梗係大鳴大放，「知無不言，言無不盡，言者無罪，有屁就放」。搵得網民改名，就真係唔好預計佢哋會正正經經幫你諗啲通達易明嘅名，而係一堆夾硬堆砌出嚟嘅詞語。蘋果日報舉咗一個幾好嘅例子，倫敦嘅 King's Cross St Pancras Station 因為《哈利波特》系列變成旅遊景點，於是響譯名徵集中就畀人將該車站改為「魔法火车站」。蘋果日報啱咗一半，King's Cross St Pancras 的確有好多人舉咗好多千奇百怪嘅譯名出嚟，「魔法火车站」只係其中一個，其他比較嚇人嘅命名有「魔幻天尊火车站」、「魔凡叉」、「莫愁•通尊火车站」，甚至「圣斗士火車站」（星矢！）。不過蘋果日報話係屬意嘅譯名「魔法火车站」只係得嗰五票，拋出嚟叉死人嘅「魔凡叉」都有239票，好在最後高票佔榜首嘅唔係乜叉火車站，而係謹守傳統嘅譯名「国王十字车站」（533票）。King's Cross St Pancras 最後倖免遇難，冇變做乜叉火車站。
由於上面已經列舉咗101個地方及譯名，大家可以趁新年慢慢睇，慢慢笑。由於個活動嘅最終目的係要呃Like（譁眾取寵），所以班中國網民都整咗好多浮藻出嚟，舉幾個例子：
Carreg Cennen Castle（威爾斯文：Castell Carreg Cennen）係一座城堡，根據旅遊局嘅介紹，登頂可以眺望黑山同參奈河（River Cennen），而最特別嘅地方係參觀地牢嘅時候，要拎住火炬爬入去參觀。將威爾斯文嘅意思用中文表達出嚟，就係話：「建於參奈河附近一舊大石上面嘅城堡」。咁按照中文一直以來嘅命名規律，好似將 Windsor Castle 叫做「溫莎堡」咁，見到 Castle 就寫定嘅「堡」字落去，多數冇錯，咁前面 Carreg Cennen 可以取參奈河嘅音譯同埋石頭嘅意思，取名「參奈岩堡」。不過好可惜，票選最高嘅命名將重點放咗落旅遊活動度，明明係一個城堡偏偏叫「火炬巡礼」，應該係名詞嘅地方名就因為咁變咗一個動詞，認真不知所謂。
舉多兩個地方做例子 Anne Hathaway’s Cottage 同 Chatsworth House。前者係莎士比亞夫人 Anne Hathaway 位於 Stratford 嘅故居。有興趣前往參觀嘅遊客多數都係慕莎翁之名而去，假如覺得中国人唔知 Anne Hathaway 係莎翁老婆，通俗啲，說可以譯為「莎翁夫人茅舍」或「莎士比亞夫人茅舍」，如果要保留 Hathaway Hathaway 一姓，則可以稱為「安妮•海瑟薇茅舍」。偏偏有人要抹去 Shakespeare 甚至係 Anne Hathaway 嘅名字，附庸風雅地塞一個「芳舍綺園」畀佢，唔知嘅人只會當係一個好靚嘅花園。同樣，Chatsworth House 的 Chatsworth 是 Chetel’s-worth 的變體，指 Court of Chetel（個人認為可譯為「查圖莊園」）。票選最高嘅叫「繁英世澤」（聽落仲好似講緊某香港網絡著名評論員），幾隻字堆埋好似幾靚咁，但睇真啲我會覺得好似掛響人哋屋企話係「書香世代」、「名教罪人」一類嘅牌匾，而唔會諗起一座大莊園囉！其他提名嘅包括「明康 龚」提出嘅「水岸豪庭」，咦，乜聽落咁似天水圍定邊度嘅新樓盤嘅？
不過最慘嘅可以算係「蘇格蘭裙」Kilt，明明係堂堂蘇格蘭國服，有條叫「之华 杨」嘅友竟然改名做「凱爾特好樂派」。我睇到嘅咁嘅名真係唔知佢係咪好肚餓，好想食 Pie，好想整個 Pie in the face 畀佢！蘇格蘭人視 Kilt 為正裝，出席重要、特別場合先會着，當然包括紅白二事！人哋白事着蘇格蘭裙，你話人哋着緊「好樂派」，你仲話人開緊 Party，咁係想攞景定贈慶（定係撩交打）？改個咁嘅名，真係完全失卻蘇格蘭傳統風味！我突然好希望蘇格蘭獨立成功，洗刷英格蘭政府旅遊部門強加畀佢哋嘅污名。
講咗咁多，大家可以自己再睇吓嗰啲慘不忍睹嘅譯名，自己搵幾個嚟鬧吓。啲人評論中文翻譯最喜歡講「信」、「達」、「雅」，我幾年前亦曾撰文探討。揸住嚴復第一句就當聖旨咁，吓吓要求人要符合三點要求，實不可取，不如睇埋《天演論／譯例言》點講先再講。不過，與其單單為文字雕花，不如先睇吓意思究竟可唔可以成功傳達出去，如果連基本意思都冇嘅，就算你整個空中花園出嚟都只係空心老倌，金玉其外敗絮其中。
不過對英國人嚟講，搞個咁嘅比賽絕對冇得輸。英國人唔係侯志強，唔會話「畀夠錢我，我連祠堂都可以賣！」改嚟改去都係改譯名，又唔係改官方語言英文名，印落地圖度又有乜所謂？都係班大陸遊客睇之嘛！你哋啲網民改個 blink blink 嘅名出嚟，懶靚懶型，但係其他人讀到繞晒口，真係理得你啦！而且睇返整個比賽，最高票嗰啲不過有兩萬左右人投票，少嗰啲直情一千票都唔夠。微博、微訊，兩者分別號稱擁有超過五億用戶，英國旅遊局透過兩大平台宣傳嘅活動，仲要送出101份獎品，再送埋機票酒店門票簽證畀兩個人玩十日八夜，睇落咁吸引但個 Respond rate 咁差，如果第日想賴賬仲可以話活動投票率唔夠，譯名唔夠認受性添。最緊要就係等你班中国人知道英國唔止倫敦、牛津、劍橋。101 個特色景點，遍布英國、威爾斯、蘇格蘭。既然你哋咁鍾意景點，咪講多啲遠離倫敦，遠離傳統旅遊熱點嘅地方，等你哋分散啲，唔好聚晒埋一兩個城市，搞到倫敦 Zone 1 變咗沙田新城市，搵你班大帝去吓 Lands’ End 呢啲冇雷公咁遠嘅地方，自己玩夠佢！至於香港人，如果唔想睇到呢啲令人眼冤嘅譯名，唔該乖乖地學好啲英文，出去旅行時拎返張英文地圖啦！