東亞運明日開幕，今日講嘢，算最近磅啦掛？啱唔啱聽，當然又是另外一回事了。反觀市面氣氛，偉大特區政府當初企圖用運動會沖喜升呢的大夢，都可以盡了。連鬧都無人鬧吓，真係淒涼過三線梅香。
點解香港人對「你我有份、開埠首創、百年難得盛事」，如斯冷漠呢？
1生不逢時
最行貨的理由當然是經濟因素。放長雙眼，他日高官解簽卸膊之時，一定不會放過歸咎外圍景氣因素。佢地亦一定不會提及心理因素。金融海嘯，傷亡遍野，心情欠佳，姑勿論政府有無監管不力縱虎行兇，但係我死老豆你擺大壽，情何以堪？仲有，要我俾足人情、早啲到、幫埋手招呼，直頭當正自己係主人家咁款，攞彩唔駛去到咁盡係嗎？所謂失意人前莫談得意事，唔係咁難明咋？
維港群星匯有幾多料到，唔係無辨你睇架係嗎？如果高官認為贈慶是為解民困憂良方，弟日佢地死老豆老母仔女之時，我們是否也要在他門前鼓樂歌舞以表安慰？
2無新鮮感
祖國百年積弱，受盡凌辱，中國人實在很需要一個站得起來的台階。問題是中國又攞牌，有何特別？我們被迫忘記每年有個六月，莫非連去年八月記憶也洗掉？莫非高官們以為中國運動員領獎場面也是張藝謀之藝之謀，也是幻象？
搞個東亞運，不外乎中國及周邊友邦圍威位開個party，情形同技安(胖虎？)約小福同大雄去後花園隻揪有何分別，結果？預咗架啦。問題是用大雄屋企，要大雄執屋善後，大雄點會興奮得起？曾得成之意氣風發躊躇滿志可能是終於發現了他的存在價值啫。
3推銷橋段與人材
九月時，我在收音機已經聽到節目主持人追問尤曾嘉麗，當時氣氛明顯不足，如何加碼推動，擺明set位俾佢上。可惜AO畢竟是According to Order，嗑咗一大輪我地做咗嘢、遲吓仲會做更多嘢嘅解簽式報告，令聽眾享受了一陣我做佢老板的感覺之後，剩返落嚟只有靜觀其變、聽天由命八個字。
或者佢地覺得sell東亞運只不過是做多一個大啲啲嘅禁毒清潔反豬流職安健柴九領導群星歡唱暨親子填色比賽頒獎晚會，豎起幡桿自然有鬼到。現實反映了高官以至整個社會對體育活動、運動競賽、運動搞手、體育觀眾等運動會組成元素的長期輕視以致衍生的無知和自大，以為將明星選手偶像化就能召聚fans，如痴如醉，任由擺佈。睇吓人地美國整個sport show business平時落幾多心機功夫做觀眾發展、落區組織和選材培訓。靠食即食麵大嘅？識條毛。
4籌備能力
聽講有部份賽事因場地未能完工而要腰斬或縮少規模，另有不知是裁判資格還是賽制問題而取消整組項目。這些還是因為影響了香港贏牌機會才爆出來，意思即是還會有一些香港人不感興趣的冷門項目甩甩漏漏啦。雖然未必影響到叫座，但是見微知著，辦事能力之低，連派飛撑場都搞到一pat屎，人山人海嘢，咪交俾民建聯做囉。
我領教過有田徑團體因為舉辦不知為乜的長跑比賽，工作人員一句我地攞咗牌，警方批准咗，就一封封哂成條吐露港來回單車徑三粒鐘，大嬸趕住返工，哭求推單車步行路過也不准，嗰副牌我攞咗，睬你哂氣，客家佔地主的嘴臉，如今歷歷在目，香港體壇多的就是這種淨識倒米嘅垃圾！李麗姍講得無錯，香港運動員不是垃圾，但不包括體育行政人員。官有官盲，民有民殘。難為傳媒仲低聲下氣好言相勸，不如擂鼓預祝中國豐收威盡香港圓滿成功好過啦！
幸福大發現
凡事都可以向好處想。香港市民對東亞運的冷感，其實反映了我們要求的層次，不以單純的民粹自慰為滿足。老實說，我們對甚麼起痰心跳，是高官以至阿爺迫不來的。至於撲到去交心的，搵食啫，人望高處吖嘛，狗何嘗不然。
圖片為編輯所加：Michelle Bartsch攝