上個禮拜大家熱議「母語」，我無加一口，因為心諗，唔係呢啲咁基本嘅嘢都要捍衛呀嘛。但噚晚去完新光睇尹光，也實在令我有感而發。
套用尹光《相士大隻西》裡面一句歌詞：「你阿媽原來係女人咩？」，我哋嘅母語係乜，仲洗講咩？但原來我哋已經淪落到連「1+1=2」都要捍衛。尹光話佢唔唱國語歌，因為太易唱，同一句歌詞可以唱晒成首歌，仲即席示範唱鄧麗君嘅《千言萬語》，一句「不知道為了什麼」，由verse唱到chorus都毫無違和感（唔信你自己試吓）；廣東語就唔同，有9個音，夾入旋律裡面好易會扭音。我都算係寫過吓歌詞嘅人，完全明白箇中嘅分別。
其實，語言無高低之分，但就一定有親疏之分。我喺阿媽個肚裡面已經聽緊廣東話，喺我出嚟面對呢個世界之前，佢已經組成咗我identity嘅一部分。我係用9個音去發聲、思考、溝通。話廣東話唔係我嘅母語，等同攞走「我之為我」呢個身份。但當然，點解母語都可以掀起一場風波，就正正係想攞走香港人嘅身份。
尹光話另一個原因佢唔唱國語歌，係因為佢啲發音唔正，然後佢又即席示範不停唱「不該」。而我對於呢單母語風波，也只能大叫一句「不該！」。