大家成日話為人父母甚艱難，其實我覺得為人子女先係最慘果個。家長都仲可以話由錯誤中學習吖，但細路就係被用嚟做白老鼠果個，只要父母唔識教，個細嘅自然好大機會連基本生活都唔識自理。你話佢蠢咩？咁冇人教又唔需要做同未見過嘅事唔識又真係好正常。正如我記得有個小朋友未見過雞蛋殻，因為屋企食到果隻蛋全部由工人或者啊媽剝好哂比佢，所以佢認知嘅雞蛋就係白色，得蛋白同蛋黃。咁佢連殻都未見過，認知有缺憾其實又唔怪得個細路嘅，根本就係佢啊媽自以為咁樣就係錫個仔嘅問題。
記得早前睇到向西講出飛機上遇到細路大喊嘅文章，第二日就比一班家長圍插佢唔睇諒小氣冇同情心之類（唔好問我邊篇，我冇幾耐先SHARE完）。向西講過嘅我唔再多講，但真係好多家長以為用細路仔咩都唔識做籍口就大哂，人地就唔可以怪佢。其實我想講班家長口中嘅同情心唔應該淨係得「人地」先可以有，帶住細路嘅自己其實先係最應該設身處地咁諗下自己件化骨龍有幾咁影響人。試諗下你見到一對情侶當街親熱，你會唔會聽到佢講要你體諒佢地而家慾火焚身，話你阻住佢地會比人燒春袋？其實對比起啲小朋友又喊又跑又大叫，街上面有活春宮睇我諗有更多人受落。但點解情侶都知咁樣係理虧會面紅急急腳走，但班父母仲可以處之泰然，對班小朋友嘅破壞行為視若無睹？
有家長會話自己阻止過，但細路唔聽。係嘅，當兩個啊媽坐低講八掛野，兩三件化骨龍周圍大叫亂跑，個啊媽通常會喺個小朋友跑入自己半徑15CM果陣用把好溫柔嘅聲音叫佢地唔好跑。先唔講把聲好輕易比班細路尖叫嘅聲掩過，佢地未必聽到，我再用情侶做例子，當你女朋友同你喺床上纏綿，臨門一腳果陣你聽到佢用一把含春咁嘅聲講左句「唔好吖」，你會唔會即時縮沙？會果個都痴線啦！班細路玩到鬼咁開心，你想佢地講一句就聽，當佢地狗啊？就算狗都要有嘢食做獎做前提啦下話？如果你咁樣做人父母都帶個細嘅出街到處破壞，我地的確唔應該怪個細路，但絕對可以怪個永遠都唔會真正去阻止細路影響人嘅家長。「養不教，父之過」，但其實做人啊媽一樣有同等責任。
生得小朋友就有責任教好佢。少不更事唔係理由，只係無能父母唔識教仔然後搵比自己嘅籍口。點解人地個細路可以咁乖咁得人歡心，但自己果個就次次都比人黑面？個個小朋友都係一張白紙，到底有冇禮貌，識唔識尊重人就睇家長有冇好好咁教。每個小朋友出到街都係代表住父母嘅教養如何，當然有人會做得好好，但可惜喺香港仍然係黑人憎嘅佔大多數。
一個讚好，是對我的一點支持。
如果想分享給其他朋友的話，請標明出處並附上專頁網址。
FACEBOOK：https://www.facebook.com/MaoYanDe
TUMBLR：http://moyinday.tumblr.com/
Fanpiece：http://women.fanpiece.com/moyinday/