語言對於金融市場甚至整個社會都非常重要。所有金融人都會明白我哋工作離唔開語言，例如我哋要同客戶溝通、或者用唔同方式進行買賣，全部都涉及語言。
過往香港金融業以英語為主，到依家就英語同普通話並架齊驅。香港金融人對住外藉同事或者客戶，都會講英語，而環球各大市場都係以英語為共同語言。到近年，因為越嚟越多客戶同同事係華人，對住佢哋，香港金融人會講英語或普通話。
另外，大家都可能留意到，係香港嘅金融中心 ─ 中環 ─ 越嚟越多察身而過嘅人全部都係講普通話。而金融機構招聘時唔會太介意應徵者要識廣東話，甚至文件上拼音都有改用普通話拼音嘅趨勢。凡此種種，都俾我哋睇到廣東話對金融人嚟講好似越嚟越次要。
但廣東話係咪真係咁唔重要呢？我就覺得唔係，因為廣東話係我、同好多香港人嘅母語。我覺得無論我哋工作環境係點樣，我哋有責任去傳承廣東話。而且廣東話唔係次一等，我哋甚至應該以識廣東話而自豪。
我分享一啲私人事，早前我為自己初生女兒去政府嘅出生登記處攞出世紙。當我向負責嘅官員講左我個女中文名之後，佢就提供二個英文拼音建議，其中係廣東話拚音，一個係普通話拼音。呢個職員係俾選擇我嘅時候，無清楚說明其中一個係普通話拼音。我唔會怪佢，佢咁做可能係因為依家越黎越多「新香港人」係用普通話拼音，不過我自己最後都係揀左廣東話拼音做我個女嘅英文名。
呢件事同金融人工作當中好多衝擊都係一樣，就係想我哋覺得廣東話係唔重要。不過我唔認同呢個諗法。我覺得香港係國際上嘅英文名永遠都應該係根據廣東話拼音而黎嘅Hong Kong, 而唔係Xiang Gang，因為香港永遠就係，香港。