陳茂波話未來5年會用《收回土地條例》收番700公頃新界私人土地，其實係真係想鬥地主、大有為定扮勇武？
睇番清楚個條數，原來口中個700公頃，9成9都係現有新發展區講左好多年個堆私人農地，粉嶺北+古洞北（182公頃）、元朗南（223公頃）同 洪水橋（324公頃），根本只係重覆用條舊數扮做野，而唔係依家個社會講緊呢堆新發展區外既棕地（例如元朗橫洲）同地產商周圍囤積既農地，所以700講公頃根本就唔會有額外既公屋多左出黎。
跟進左新界囤地收地問題假假地都成10年，當然唔會忘記，700公頃重會收埋陳茂波自己個塊在90年代買落既上萬呎古洞北農地。多謝香港畸型既體制，俾人話「囤地波」咁多年唔單唔駛落台，今日重有得昇官發財，同依家林鄭一模一樣。如果古洞北因新發展區而昇級去甲級農地賠償，講緊當年買入價約100元／呎今日可賠成1300元／呎，完全不勞而獲炒農地賺上十倍。
從以上分析，會收700公頃好明顯亦都係玩數字遊戲，扮下積極解決房屋問題消弭民憤，因為唔單只翻炒條數，當中既私人農地政府其實有唔少已經同緊地產商進行「原址換地」，即係類似依家講個種「土地共享」咁公私合營私相授受，唔收地產商囤番黎既地直接俾佢地起原址起豪宅。所以700公頃條數會有好多收地水份，換剩既小地主、小農戶既地先會俾政府未來用土收做公屋同設計，當然唔少得收黎起基建俾地產商區內啲私樓地，咁又點會係叫鬥地主呢？
剩係睇全新界最大農民恆基地產最新年報，話到明粉嶺北以前囤落既240萬呎農地有3分1（80萬呎）都換到變屋地，總樓面面積去到400多萬呎，囤中既位重準過歡樂彩虹拋銀仔。四叔買個陣主要係90年代末2000年中末，買既價講緊係200至300／呎，俾你農地轉屋地差唔多double左個呎數不但只，未來係一呎賣成2萬至3萬/呎既天價豪宅，其實最尾又會係咩人買?
對著依家個特區政府真係hopeless，依家一邊走出黎話對話另一邊又開始出黎造假數，以為可以用番以前啲玩數字就呃市民做到野繼續玩利益輸送，所以大家真係唔好簡單以為用土收就解決到房屋問題，因為整個體制已經腐爛到一個點，香港去到呢個田地，囤地波重要黎同你玩數字，偽善至極。