尖沙咀地鐵站爆炸絕對係噚晚Facebook最多人講同Share嘅新聞，網民放片同Update情況嘅速度冇邊間媒體夠佢地快（當然好多流料依點冇變過）。只不過無論係㗎車未停站成個車廂都係煙嗰陣定係之後列車埋站啲人走哂而㗎車仲有嘢燒緊都好，好多人做嘅唔係準備逃生、即刻去安全地方甚至幫下有需要嘅人，而係個個拎住部電話影相拍片，荒死冇人知你身處事發現場一樣。
香港人真係好奇怪，無論身邊發生咩事，小至鬧交大至爆炸都要企喺附近拍下片先安落，就好似一放低部電話就會暴斃咁。佢地冇諗過試下救火救人、冇諗過燒緊嘅嘢會再爆炸、冇諗過嗰個狂徒／恐佈份子／癲佬（嗰陣你點會肯定到咩事）可能喺附近準備又爆多次，甚至參與者唔只一個人。你唔識救火，你驚都好，唔緊要，起碼你顧好自己嗱嗱林有咁遠走咁遠離開個地鐵站，最基本都離開車卡離開月台，唔好阻住做緊嘢或者之後落嚟幫手嘅人，更加唔好做下一個傷者。平時返工放學你都知個月台幾迫啦，咁混亂仲要一堆人搵位拍片，救護員落到月台仲要過木人巷咁先救到人，萬一傷者因為救遲咗一兩分鐘而有乜冬瓜豆腐係咪你負責陪返個仔女、老豆老母、老公老婆比人？
你話月台班人抵鬧，但㗎車仲行緊嗰陣唔拍片都冇嘢做？咪傻啦，有帶水嘅拎出拎倒落紙巾毛巾比老人家細路掩鼻、近滅火筒嘅人拎定出嚟備用（唔識就問有冇人識再比佢啦）、提大家排一排好隊準備一開門就可以最安全最快咁全部人離開車廂、頭尾卡打開埋緊急逃生門加快逃生速度，但睇條片除咗有人Call車長之外其它人就繼續拍片玩電話，一啲都唔擔心自己安危。
香港人啲危機意識真係低到嚇死人，如果今次真係恐怖襲擊我諗要過百人死真係一啲難度都冇，恐怖份子是但點個火引人拍片拍再嚟個人肉炸彈就可以炸死一堆人。香港天災人禍咁少都唔知算唔算好事，平時就話風平浪靜啫，一瀨嘢真係可以整死一大班人，因為班人根本唔知點應對，甚至自己行埋去拍片「受死」。港豬依個名真係冇改錯。
一個讚好，是對我的一點支持。
如果想分享給其他朋友的話，請標明出處並附上專頁網址。
FACEBOOK：https://www.facebook.com/MaoYanDe
TUMBLR：http://moyinday.tumblr.com/
Fanpiece：http://women.fanpiece.com/moyinday/
圖片來源：網絡取材