近日又有立法會議員再提重推租置計劃，又話維修管理複雜都只係業權份數技術問題，唔難處理。喂，明明公屋原意只係出租，幾時起出售係應份？係咪忘記咗呢幾年令人嘩然嘅過萬呎轉售公屋？
據運房局上年回答立法會議員的資料顯示，截至2017年3月底，推售租置單位總數184,100個，當中未售出單位49,100個（27%），已售出的單位135,000個（73%）中，2,000個已補價（1%），133,000個（72%）未補價。
睇落已補價得1%好似好少，但其實已售出俾公屋戶後仍可以未補價售出，即係呢135,000個租置公屋單位隨時可於自由市場同綠表市場炒高價來賣。
睇返已補價轉落自由市場嘅公屋，近年成交價相當驚人：
深水埗李鄭屋邨，18年5月成交，成交價538萬元，實用呎價10,891元
青衣長安邨，17年10月成交，成交價398萬元，實用呎價約11,404元
藍田德田邨，17年9月成交，成交價232萬元，實用呎價15,890元
黃大仙鳳德邨，17年8月成交，實用呎價15,540元
將軍澳景林邨，17年7月成交，實用呎價15,359元
綠表公屋都有，如黃大仙東頭（二）邨，18年3月，成交價408萬元，實用呎價7,133元
的確係有公屋戶想買返自己間公屋，但最大前題就係因為政府收緊富戶政策，令人好驚自己住得耐，老年有啲積蓄，又被當成富戶，咁不如干脆買返自用保障自己。唔想被逼遷心態可理解，但到底而家講嘅係咪真係純綷俾人買來自用，定留尾巴俾人再將間屋流出市場炒賣？所謂「置業主導」，根本唔係單單「有能力者自己搞掂自己」意思，而係想大家再「藉著物業升值累積財富」，令全城人繼續依賴同成為地產霸權一份子。