香港醫學界盲控煙，真係盲果個都睇到，連電子煙同加熱煙呢兩種輔助控煙工具都話要全禁，簡直係黐線，但依家更令人不可思議係郭家麒，佢應該知道佢選果個選區，唔係以前嘅半山東區議會選區，而係新界西立法會選舉。佢身為醫生，應該睇過 Public Health of England 嘅實證報告，我諗如果佢想佢選民嘅健康好，應該係贊成政府跟PHE做法，將加熱煙同電子煙合法化，而唔係禁絕。
郭家麒針對加熱煙理據同政府一樣荒謬
首先，今日郭家麒發份新聞稿，話係以電話民調為理由，指市民支持禁電子煙同加熱煙果家嘢，本身係偽科學同黐線，香港政客好鍾意用民調為自己啲奇怪政見壯膽，無論泛民定土共都係用一樣嘅惡劣手法，如果市民嘅認知係錯誤，咁你郭家麒醫生係咪又跟住一齊癲？呢種假論據，本來就已經係反胃到爆，我唔知用嚟做乜。
相反，紐西蘭嘅研究，都指未食過煙嘅學生，大部分都唔會食電子煙，但好多食緊煙果啲，反而會轉食電子煙或加熱煙，呢個本身唔係對控煙工作嘅勝利？就算依家煙廠嘅尼古丁貼，邏輯都係減少香煙嘅遺害，無錯，你依賴尼古丁嘅問題解決唔到，但至少少好多由焦油等造成嘅二手煙以及公共衛生問題，同樣道理，電子煙同加熱煙都係做緊一樣嘅野，應該要儘快做好規管，點解香港醫學界要由頭反到尾。
仲有一樣嘢，郭醫生話阿根廷、巴西、泰國呢啲國家禁售加熱煙，但先進國家如英、法、德、意、日、韓都係容許加熱煙銷售，第三世界國家唔准賣加熱煙好多涉及貪污問題，香港做乜要同呢啲國家睇齊。
點解我對香港醫學界有諸多質疑，如果真心想控煙，係應該俾電子煙同加熱煙合法化，並且享有相對低嘅稅率（如果無尼古丁成分應該免課稅），而傳統香煙反而加重稅，因為無論點講都好，傳統香煙帶嚟嘅二手煙問題，以及呼吸道問題，呢個大家已經公認咗，唔駛再辯論落去，咁樣引導煙民向一個無煙世界唔好咩？依家醫學界嘅邏輯，更可能變相阻止藥廠推出解決手感問題嘅戒煙產品出現，我唔知醫學界反煙嘅人諗啲乜嘢。
郭家麒係做咗多年議員，其實佢對公共政策應該熟書，應該知道有啲嘢叫兩害取其輕，而唔係做控煙塔利班，有時香港泛民啲政客被指經常做埋啲唔等駛嘢，或者個人離地，呢啲咪係好例子，仲要郭家麒本身就係醫生，真係令人失望。