「XXXX！你個XX，老廉大X晒呀？頭先喺入面恐嚇我，依度咁X多人，我唔X驚你呀！」在羅湖出境大堂，被捕人士「大嚿成」在幾百名出境人士面前突然發難。
「XX！我要搵律師你又唔俾，仲喊打喊殺！你咁好揪，隻揪吖！XXXX！！！」大嚿成除即脫去上衣，露出胸口「蛇貓紋身」，然後抱拳「啪手指」作熱身狀。
面對六呎四，大嚿成只矮兩吋，磅數最少重30，而且打慣拳頭交，戰力十足。
「移民局」的二粒花和幾名伙記隨即企埋我身邊：「師兄，呢度我地頭，有需要出聲」，我點頭致謝。
既然大庭廣眾被誣衊，我於是堅定高聲回應：「大嚿成你係咪食咗藥有幻覺呀？幾時有人要打你呀？咁大個人，周街除衫，咁肉酸，賣武咩？著返件衫啦！唔俾你搵律師？你律師咩名？知唔知電話？你唔知搵邊個點幫你搵呀？一早同你講廉署有律師名冊，返去任你搵，你咪喺度發癲啦！」
大嚿成死撐：「總之你打我，我就要投訴你。」
六呎四：「你望下自己，除晒衫，毛都無少條，邊個打過你呀？係嘅，去驗傷。」大嚿成一時不知如何反應。
老廉伙記細聲問道：「廷Sir，要落扣嗎？」
六呎四：「等等，大嚿成，你做完大戲未，做完就著衫跟我走，或者落孖葉押你走，你揀！」
大嚿成見被成十個移民局加廉署人員包圍，又唔想落扣，開始軟化，聲浪大幅調低：「阿Sir，對唔住，我一時衝動，講錯嘢，我返去你幫我搵律師。唔該晒！」
我心想古惑仔即係古惑仔，變面真快。
返到廉署，將大嚿成交到扣留中心後，和伙計喝杯茶，被問道：「廷Sir，頭先佢粗口問候，你唔勞氣嘅咩？」
六呎四：「人必自侮然後人侮之，我哋執法，佢犯法，點可以同佢一般見識？講粗口係侮辱佢自己啫，侮辱到我咩？」
原文刊在 am730