攝影：Alex Leung
依幾個星期擺街站，大部份途人都反送中，但很多藍絲大叔經過都罵我們。近日好多青年擺街站，令人欣喜，但亦見到他們被這些藍絲中年人士招呼，破口大罵。究竟藍絲大叔是怎樣鍊成的？
我估這些中年人士，上了一定年紀，都傾向想「穩穩定定」。一係就已有公屋，一係已有層樓，亦長期睇CCTVB，民主派及年青人被塑造到「搞亂香港」，好似會影響佢地「穩定」的生活。所以，其實都真係要在家中裝收費電視，在家中loop有線及NOW的新聞，好過睇香港中央電視台的新聞。
另外，就係要想辦法斷絕他們接觸建制派衛星團體的機會。各位仔仔女女，多一點番屋企食飯，忙還忙，玩還玩，多D陪屋企人，唔好俾建制派乘虛而入。
若你唔去和父母飲茶，他們便去免費建制團體的平價茶聚。而科技日新月異，也可教下父母用手機各項功能，千萬不要串父母IT水平低，若你唔教佢，佢就走左去建制的長者手機班。
其實，講咁多，都係想講，父母和大家血脈相連，你能夠保持和他們良好關係，點都會聽你講幾句。他們亦需要你的關心，父母同你講緊野，就唔好篤電話了。建制派一路的策略，就係向中年及長者提供「關心」，然後不斷在活動中向中年人灌輸「泛民收錢示威」、「青年人搞亂香港」等訊息。
你能成功說服家中藍絲父母的機會，一定大過在街站說服藍絲大叔的機會。係架，關係要經營，但關心父母是兒女應盡之義，絕非建制派以選票為目的而提供關心。
青年人能夠有能力衝出馬路，在星期三早上佔領馬路，其組織及勇氣令人動容。誠然，無論今次反送中，或日後的各式選舉，小戰場一直在自己家中。就由今晚開始，多些返屋企食飯，並在飯後向父母說聲煮得好味，並在今個星期日中午和父母飲茶，然後嘗試解釋點解要去遊行。又或者豪D，買部新手機俾佢，換走佢部小米及華為。
要街上的藍絲大叔減少，就要靠各位仔仔女女。再次多謝星期三早上衝出各條馬路的年輕人，是整個反送中運動的轉捩點。有你們，是香港的榮耀。