香港人日常接觸既中文有三種： 國語書面語，粵語口語，國語口語。
要以香港本位出發，扎根本地文化，建構本土精神，築起香港人身分認同，唯有依靠第四種文體：粵語書面語。
粵式書面語，尼種文體零零聲聲散落過係粵劇，粵語歌詞，小說，無一套公認既官方書寫系統，從來無人在意。以往學中文， 無太嚴格區分兩者，雖然國語為主，粵語為輔，即使上堂作文，亦有一定自由，詞彙固要必用港詞港字，如蕃茄，巴士；文體上，亦常有粵語影子。上一代香港文人輩出，中文文雅得來又帶點生鬼趣味。粵式中文同國語中文兩者混用，有時更係神來之筆。黃霑一句：我地大家在獅子山下相遇上，有音，有意，邊個敢改走個「地」字？
寫好文貴乎語感。我地寫文時候腦海浮現既，係粵音，只有用粵語寫作，先最合音，合意，貼合自身語感。國語有輕聲，助詞如「的」，輕聲用起上黎起伏有序。但同樣尼個「的」字，落到粵音就讀頗為硬耳。吾信？試用雙語各講一次「我的天」，粵語時個「的」字難免喧賓奪主。平日我地閱讀國語書面語，硬係隔層紗。要我手寫我口，只有粵語書面語。幾多個夜深你我曾仰望粒粒閃閃星輝既國語文學，踏步邊城，眺望西潮，飲啖清甜既民初泉水？但清晰既民初白話已不復見，黨國化工廠已污染左國語新文學，未來學制下小童飲既，只有含鉛毒水。
可憐香港莘莘學子，先有正音運動洗腦將親切既粵語就地「正」法，好地地機構二字人人識讀，電視電台日日教你讀機「救」，再黎更大鑊既普教中，機「救」變埋「支」「救」。加上黨舌當道，打造優化黨語平台。港共緊貼國情，劣質翻譯，黨式官腔，文革餘毒，已經慢慢潛入我地意識。當有刻祖國正式吾恩賜我地講粵語，要我地做文明人，說普通話。又中秋，只能慨嘆明月「甚麼時候」有？
滾滾長江，點會只得一條支流？
世上最難既語言課，無非係要學用九聲粵音寫傳統繁體字。我地覺得輕而易舉，係先天優勢，文化寶庫。好遺憾，上一代畀我地既天籟，偏偏變左最受嫌棄既胎記。係我地眼中，粵語等於俗語， 要學，就學好英文，學好煲冬瓜。講得一口吾純正既粵語，某時，居然係身分象徵。好多自以為中文好既老師教授，更係對粵語字詞避之則吉。使用時，必定配上一個大大既括號，加上口字旁，最怕人思疑自己錯用粵語。何其荒誕？
香港人有日若失去語言，只能怪自己被殖民心態劣根未除。從無諗住保衛自身文化，要知道，要到位表達香港獨特文化思想， 唯有用粵語。有好多有心人推廣粵語，我深表敬意，但容我一問，你地有無試下用粵語書寫？撐粵語，就應該撐寫粵語。吾建立粵語書面語，粵語永遠只停留係方言俗語，香港文化將被邊緣。
我並吾系提倡直接將口語入文，中英雜用，走捷徑；而係反之，舍易取難行之道，以粵音為主寫作，逐漸行出一條新既粵式中文書面語之路。因為，我深信，粵語市井時固然可比國語粗鄙，書面文雅時亦可較北方話體面。語音隨風而逝，只有文字，先可成為長久既基石。吾止文學，根本社評，新聞報導，官方書信，甚至政黨政綱，都可以用粵語書面語書寫。要建立書寫系統，並為大眾認受，絕非一朝一夕，行既人多，自然成路。
下一話：粵寫第二章－入門。一齊研究點寫粵語書面語。