前日係我最後一日喺立法會返工，因為我已經辭去咗立法會議員助理一職－－大學畢業後嘅第一份工。五年半議員助理生涯劃上句號，感激葉建源議員、議辦、教協上上下下所有同事們嘅教導。
辭職係為咗專心落區，但呢個決定並唔容易做，因為之後一段長嘅日子我都唔會有人工，但如果唔辭去正職，根本無法做好社區工作。過去一年半，好似返緊兩份工（其中一份冇人工），只能硬著頭皮撐下去。
不過由聽日開始，我將會成為一個比全職更全職、但冇人工嘅「民主農夫」，全心、全身、全力深耕社區，以謙卑嘅心服務街坊。為了追求理想，只好付出代價，燃燒過去五年半嘅積蓄，燃燒27歲嘅青春。 相比起仍在獄中、即將入獄嘅政治犯， 我嘅付出實在微不足道。
台灣美麗島事件受難者、前高雄市長陳菊曾經講過：「如果你的生命中有段時間可以實踐自己的理想，不用去考慮任何人的利害關係，只要盡情發揮，豈不是人生最幸福的事情？」
人生係由無數選擇積累而成。由細到大我一直住喺公屋， 對貧富懸殊問題有深刻感受，所以大學選擇咗去讀社工，希望幫助基層。入咗大學之後， 參與中大學生會、學聯，深深咁明白到政治、民主、民生係不可分割。喺2013年，我從中大社工系畢業之後，選擇咗去做立法會議員助理，喺呢五年半期間，我同大家一樣睇住香港嘅政局與立法會不斷沉淪。
雨傘運動、旺角騷亂、DQ立法會議員風波、人大釋法，特首選舉、高鐵割地兩檢、修改議事規則，立法會補選......
面對住不斷進化嘅威權統治者，我哋好似咩都改變唔到，呢種政治上嘅無力感好像滾雪球咁越滾越大，對民主運動嚟講係致命嘅。如果沒有新的方向、新的目標、新的論述，民主派支持者對政治理想嘅熱情將會冷卻、不再投票、不再參加社運， 而中間派亦都會向建制靠攏。
香港正在沉淪， 我時常問自己究竟仲可以做啲咩？ 電影《悟空傳》其中有一句令人熱血沸騰的對白：「在你感到最無助最無力的時候，才是你真正覺醒的時候。」
點解我哋成日輸比政府、保皇黨？除咗因為大政治環境對民主派極之不利之外，我哋本身嘅實力都好差，特別係地區組織方面，跟保皇黨強弱懸殊。所以喺當下，我哋只能防守，為民主運動累積力量，喺各個陣地寸土必爭，為未來播下希望嘅種子。
大約兩年前，我喺度諗緊，未來嘅民主運動係咪可以有以下三個短中期目標，以重燃大家嘅希望：
1)民主力量需要進一步在社區上紮根， 抵抗社區染紅
2)培育更多年輕人參政， 同中共鬥長命
3)民主派爭取「社區執政」，區議會議席過半， 獲取更多資源和權力，不再單純係「反對派」， 產生18個影子市長， 地方包圍中央
只要達成呢三個目標， 就可以大大增強民主派跟政府談判時嘅籌碼 ， 不論喺民生定係政治議題上面。當土壤建立好之後，下一波民主運動就會隨時出現。
改變不會從天而降，要靠大家一起繼續努力，未來嘅路非常難行，拜託大家督促小弟喺地區上嘅工作，大家可以去我嘅office搵我吹水（太子大南街88號閣樓）， 亦歡迎大家幫手做義工！ 感激不盡！