編按：歐陽鋒自760年前自盡後，他一直有在陰間留意著神州時事，見證了數百年間神州大地的歷史演變。最近他非常關注香港發生的衝突，雖然他懂得用Facebook同Instagram，惟陰間律例禁止使用VPN，加上網速只得56K，於是他非常焦急，並透過報夢著我向大家傳達他的訊息。
「我喺呢個地方住咗超過27萬日，同你哋香港人一樣，唔多唔少都會對自己地方有啲感情，例如屋企樓下嘅公園，每日都會經過嘅唱片鋪。見到個公園愈嚟愈多人，唱片鋪執完一間又一間，我先發現原來感情會隨環境變遷而改變，可能係因為人心，更多嘅係我愛嘅地方已經唔再可愛，不論地府或香港亦都如是。我生前係一個殺手，以前喺一個地方留幾耐，我無得揀，但與其話我無得揀，不如話我根本對呢度係又愛又恨。你哋香港唔同地府咁有得改變。
每一個地方都有自己嘅規矩，包括我都有我嘅規矩，好多人以為我以前係收錢做嘢，但我有我嘅原則，只會殺該殺嘅人。今年係2019年，土冥合相，易生大變動，聽講喺東邊有一個年輕人殺死咗一個人，結果成為其他地方嘅藉口，要改變呢個地方嘅規矩，將佢地視作有害嘅人繩之於法。本來劍客就該大隱隱於市，但如果連自己地方嘅規矩都捍衛唔到嘅話，結果就會同屠場嘅動物一樣，生死由人。作為一個殺手，向來只有我去操蹤生死，所以要改變嘅話，就只能反抗。
2019年6月9日，我見到大概有103萬人由對面海嘅東邊走到西邊，目的就係要透過反抗嚟建立新規矩，大家最終畀地方巡兵逼退，雖然大家當晚無功而回，但6月12日大家繼續出動抗議，結果巡兵為咗驅散人群，射咗一百五十粒催淚彈，20幾粒膠彈、布袋彈去鎮壓一班手無寸鐵嘅平民。煙霧中嘅迷濛，表面係鼓勵大家離開，但其實係提醒大家，規矩就係規矩，絕對不能退讓，如果要守住最後嘅邊界，就要有無比嘅勇氣同堅毅，即係要謹守大家嘅信仰同原則，但殺手偏偏最忌嘅就係有勇無謀。
我知道啱啱又有一位青年落咗嚟，大家放心，我同洪七公會好好照顧佢。
我以前係一個殺手，我只殺該殺嘅人，雖然有時生意好少，但我起碼知道原則係大過兩餐溫飽，因為溫飽係一時，好多嘢係跟一世，6月16日係甲申日，宜出行、架馬、入殮、修造，亦係我第一次由東邊出行嘅時候，殺我該殺嘅人，保護人該有嘅原則。」