立法會選舉告終，但後話好多，有一單冇乜人提，就係新東候選人梁金成（金金）畀網民取笑得票比另一候選人陳玉娥（娥姐）少，勇奪今屆立選低票總冠軍。本嚟邊個低票對結果係冇影響，但金金低票「奪冠'」就畀某些左報放大，話呢位港獨分子以「輸足九條街的姿態」出局，以此明港獨冇運行。由於本身同隊排頭嘅陳國強被DQ，於是由金金頂上。佢被歸為本土派，亦公開講明會推動港獨，港獨立場比青年新政甚至熱普城更清晰，所以畀左報稱為明獨派（青年新政就係暗獨派）。
雖然新東有三個本土派名單，但金金名氣不及陳國強，外界亦將目光主要集中喺梁頌恆及陳雲上，加上有部分本土派支持者對金金甚有意見，資金亦有限，所以一直係新東選區入面嘅隱形人，佢係有擺街站嘅，但冇人哋咁疊馬，你行過都未必會察覺，冇睇清楚會以為叫人報名學車，而佢喺選舉論壇亦冇令人留下深刻印象，所以最後低票當選都唔奇，但最慘係少票過娥姐，連本土派支持者都恥笑佢，有人話佢係多屆立法會選舉入面最低票嘅一位參選人，甚至有人要到投票前一日先知有個叫梁金成嘅本土派人士參選咗今年嘅立法會選舉新東區。
如果計新東金金的確係史上第一低票王，但講到全港選區計，2008年立法會選舉九西區嘅柳玉成先係奪得香港立會史上最低票嘅參選人，當時柳玉成得209票，比金金仲要少96票，呢位因為畀中國共產黨政府政治迫害而移居香港嘅南京人聯同親台（深藍）人士梁雪芳參選2004年首次參與香港立法會九西區選舉，當時都有成千票，但真正令佢成名係2007年香港立法會港島地方選區補選，因為陳方安生出選所以引起唔少花生，大家至驚覺有一個住喺香港超過二十年經常接觸社會嘅親台泛民人士居然只識講普通話。而2008年香港立法會選舉佢都有參選，結果以209票低票落敗，仲記得佢成日同黃毓民互插，每次畀毓民屌到佢想喊咁樣就玩疊聲，一個講普通話一個講廣東話，就好似雙語配音但未調頻一樣。
呢位親國民黨，加入過社民連，但畀社民連極速掃走嘅大叔曾經喺Yahoo Blog用簡體字寫政治文章，多數同反共有關，我有一段時間都成日上去睇，都係咁樣先了解到究竟班在港親國民黨人士有咩見解，我記得佢個Blog每晚瀏覽量唔過十次，幾乎係我創造出嚟，所以幾肯定得我一個人睇，唔知你又記唔記得呢個人？