本土派部份人及支持者，近年一直攻擊民主派。大家理念唔同，無計傾好正常，但係攻擊民主派會對自己有咩益處？無，剛剛相反，害處好明顯。
凡事都有一個過程，你要人支持你，就要係安全環境下增強自己勢力，唔好妄想一覺醒來自己得到天下。如果攻擊泛民令建制派得到超過三份之二議席，可以任時立法、廢除法例，後果係點？廿三條、網絡廿三條，以及各種惡化會立即推出，情況等於臨時立法會時廢除集體談判權一樣。咁嘅情況下，對於本土派日後發展係極之不利。點解要自己羽翼未豐嘅時候將自己置於不利位置？
當你令泛民去選票嘅時候，有無信心本土派得到相同甚至更多嘅選票？無，因為你鬧走咗好多潛在支持者。有唔少人主張港人自決，亦有唔少人討厭民主黨，問題在於點樣吸納呢班人，靠鬧可以吸引更多支持者？或者100個入面有10個會，但香港人或者全世界人都係一樣，最好吸納方法絕對唔係鬧，而係講道理及感動。人係感性嘅動物，你不停鬧會令好多人討厭，就算唔反對你嘅主張，都唔會認真聽你嘅主張，聽咗、認同，都會因為你嘅態度而唔投你。呢樣就係點解青年新政等新興本土團體快速得到支持，而熱血公民等團體支持度升幅無咁快嘅原因。
親和力先係吸引人嘅利器，攻擊性嘅罵戰唔係。
到最後可能有20萬人支持你，但呢個人數可以做到咩野？選兩個人入立法會，然後繼續由泛民支撐，再繼續鬧泛民霸住個位。但實情係你嘅支持者唔夠，所以泛民先會仲有咁多議席，而鬧人唔會幫你爭取到更多支持者。
如果只得十萬八萬人，我建議你地武裝起義，買驅逐艦、坦克等，以對等武力對抗中共。但如果你仲想100萬、200萬香港人支持你，成為議會內最大黨、無血革命嘅話，你係要諗吸納最多人支持嘅方法。
你話咁做好膠，班港豬根本無得救，但你要再壯大力量，就要將呢D你睇唔起嘅人都吸納返嚟，要令呢D人都支持你。選票，就係實力，你講到幾咁美好都好，無人支持你嘅話有乜用？
本土係長遠戰爭，要得到大多數人支持，就要有耐性，用理論、感情去打動其他人，令自己成為大多數，而唔係鬧走潛在支持者。呢個過程會好漫長，唔係十年八年可以成功，到真正有把握轉勢嘅時候，當本土得票過三份一甚至過半數，泛民係會自然倒下，唔使你鬧都會收皮。
仲有一點，本土派無派人出選超級區議會，真係泛民派出多個名單打壓？正如唔少你地嘅支持者一樣，本土派根本就唔會聽泛民建議，如果沙田區區議員陳國強得到15提名票，佢唔會出選？佢一定會。陳國強得唔到票，只可以話係本土派區議會勢力薄弱。唔好咩都借機打壓泛民，咁嘅情形之下，泛民有事本土都會死。