共享單車唔係新鮮事，我甚至坐車個陣聽到隔離兩個學生妹tip Dse題目，話Econ一定出貿易戰，通識可能出共享單車可話喎。
有時候學術有樣野唔好，就係成日將一件事複雜化：根源性、針對性、市民接受程度、可持續城市......其實共享單車呢件事，真係可以好簡單。
首先，唔好再同我講咩外國搞到風山水起，香港一樣得嘅廢話。大家唔係唔知香港幾逼、多人又多車，我當共享單車好受歡迎，最後咪又係啲窮人踩，即係本身要搭巴士嘅，就走左去踩單車。但係同時間，巴士仲有好多乘客要接載，所以道路上嘅車輛數目未必減少。
更何況，如果行人路太擠擁，踩共享單車嘅人就要踩出馬路，但係單車嘅時速大約20公里，同汽車嘅時速根本無得比。喺同一條馬路上有快有慢，汽車要踩慢啲讓單車使用者，甚至仲會惡化交通擠塞嘅問題。
至於有錢佬有頭有臉揸法拉利，點解要同你踩單車？
而且，我地社會唔少人都係著西裝西褲返工返學，出汗之後裇衫就好明顯有汗印，大家都唔想尷尬架，仲有體臭嘅問題，香港人重臉子重飛屎，何必慳個幾雞搞到自己晨早流流就身水身汗？
筆者都明，唔係慳唔慳車錢嘅問題，係要環保、要減排呀嘛！但係上面都提到，單車同汽車一齊行只會惡化塞車問題，到時啲車停曬喺度唔行得，咪又係排出廢氣。
成日都比人鬧無單車徑，大家都明嘅土地問題嘛，咁之但係，喺行人路踩共享單車又尷尬又危險，行馬路又唔掂，呢壇野真係唔易搞。
如果諗住可以靠啲單車發燒友帶動風氣，咁真係幻想得太美好。佢地一人多架私家單車，甚至愛車如命要擺喺屋企，同埋一出巡，就要著返件戰衣喇。就算有啲人平時踩慣單車，佢都有部私伙架喇，啲functions仲要靚過曬街頭啲共享單車，點比呀？
係唔係guarantee每朝早都有一架共享單車泊喺我樓下？無人可以踩走佢架！
唉，又係香港本身嘅問題啦，山多平地少，成日都要上斜落斜，踩住架單車又無波較，好辛苦架。
同埋，係咪要down個app定比按金話？咁麻煩，都係咪喇咪喇！