我承認，我以前係政治冷感既果批人既其中之一個。邊個做凸首？事旦啦。貿服？唔關我事啦。但利申，我係反對，甚至討厭自由神，更遑論自由神同香港人既不同習慣下而衍生出黎既種種影響。
之前一直講緊佔中呢樣野，我次次都一笑置之。因為所有大小遊行，我都唔會參與，有時仲會暗地裡笑人：「行得咁辛苦為乜，最後咪又係無人理」所以你話係咪話多舊魚先。而且犯法架喎，梗係唔贊成！我呢D小市民好怕死架咋，怕比人拉架嘛。
直到928呢一日，我突然對90後既小朋友們另眼相看！
我以為我呢D老野，已經同現今既後生係溝通唔到。但係佢地竟然為自己既未來發聲，甚至身體力行。
我真係好佩服佢地，因為我做唔出，無勇氣，甚至「懶」得去行動。
雖然「阻街」係唔岩，我又利申，我住同返工都唔會經過被佔果4區。但有人幫手發聲，爭取我地可能下一秒就會無既野，我唔應該去抱怨。最多出少幾日街，反正自從自由神黎左，我都少左行「重災區」。
但我都明白比人阻住哂既心情，因為自由神既喼同人陣，永遠都阻住我上落電梯，出入地鐵……
拿拿拿，我又利申，我唔係從事服務性行業，亦唔係做計commission既行業，更加唔係做日薪既行業。所以佔中影響對我真係唔大！所以我係咪唔應該出聲？
但係我又唔明，金行，藥房係咪真係需要咁多？藥房賣日用品既我都算……金行喎， 究竟有幾多香港人會成日入去買金， 買鑽， 買撈？ 我知， 靠自由神既生意丫嘛……但有無必要咁多間先， 咁樣即係自己公司同自己公司爭生意啫…但總有一日連自由神都唔會再買架話？買得多都悶啦……
所以振興經濟，來來去去都只係振興某幾樣行業，但就令到幾十萬唔係呢D行業既人「硬食」哂帶來既不便……之前無人出聲咩？其實香港人成日都出聲架啦， 係出左架，之後咪又係咁。咁之前點解又無咁分化？依家仲要連香港其他區都攻陷埋……我頂！
香港人睇錢份上，呢樣野就一向都係……但我真係勢估唔到，出埋暴力！
又再利申， 我無屋企人做警察， 但朋友都有1，2個係。我對警察呢個行業無意見， 不過就認同阿媽所講既「警察咪又係爛仔」。係928呢件事上面， 我知道亦唔可以只怪罪去「警察」身上， 身為打工仔， 我明白有時係好無奈咁要聽從上司既指示， 就算你明知果樣野係錯。
而我都明白， 有時你上司其實都係好無奈地聽大大大老細支笛黎做野， 除非你做一個甘去滔火海的人……有人犯法， 警察出黎做野， 我認同既！ 雖然雨傘行動既學生們個個都好和平， 但霸住條街， 係的確犯法（其實閻王要你死， 你講咩都冇用架啦）， 所以警察出黎維持治安係岩既！
但個問題又黎喇， 咁點解打人果D， 揸人波果D， 警方又唔一視同仁？ 好， 你地話， 又係你班佔中既人話警察唔好乜唔好物， 人又得果2萬幾人， 係唔夠人手架喇， 你地講哂啦…下刪一篇文章咁長既辨論… 咁警方夠話維持香港安定係佢地職責， 打人同揸人波都可以歸納於安定？ 你夠薑答係， 我相信更多人會企出黎， 鬧得你地更難聽……
想人民信服於你， 而且你地仲要係執法果班（我知， 唔係立法果個丫嘛)， 比多少少包容， 你地話人地辱罵你， 咁你地咪更加應該無私咁幫手處理搞事既人， 而唔係企係度扮聽唔到， 更甚送人地上埋的士…咁樣做， 你叫人民點信你地唔係黑白夾埋做野？
若然你地話自己係香港人（我唔只講緊警察， 仲有愛XX， 反X中果班受影響市民）唔該， 拜託， 真係唔好自己人打自己人， 我知有錢分， 我知你地著制服時又變返執法人， 但要打自己人之前， 係咪應該先安內、後攘外？
先唔講究竟「外」係指邊個， 首要係先要自己人團結….團體呢點， 我已經係班學生， 自發市民身上見到， 但其他人呢？
人類係應該有個人既獨立思想， 尤其係一個新聞自由， 言論自由既環境下。所以我尊重每個人有唔同政見， 但依家香港既「亂」， 唔係果班學生， 唔係果班自發既人搞出黎！
問題根本係一直都有， 一直都加深緊（原因唔再詳講)， 為左唔再嚴重蠶食我地（思想， 包括埋資源)， 我地係咪需要先收起自己既偉論， 自己既暴力， 自己既利益（我想話， 祖國來了， 你既利益第時都係共產架咋)， 好好團結等能代表到我地既凸首先生接受、處理依家香港潛在既問題先呢？
雖然我係政冷， 但我都知道凸首先生係應該著手處理香港人既訴求， 等香港可以更加促進和諧， 推動經濟既人， 甚至應該話係代表整個香港人。
但凸首先生唔想傾， 只係用暴力打壓有勇氣出聲既人， 咁係咪真係香港就會變返以前咁？ 唔出聲， 唔指控， 唔靜坐…係咪香港就會無啦啦變返以前咁？
咁其實唔洗要立法會啦， 唔洗要議員啦， 咩咩愛香港團體…反正以後都唔可以有訴求， 無訴求又洗咩D議員團體出聲啫？ 更加唔洗立法啦！ 因為已經唔洗投票決定喇嘛~
人總要向前望，向前行，想返到過去的香港，我知道係無咩可能，但我覺得香港係可以好過以前！
無勇氣走到最前線如我，唔緊要，繼續唔出聲係OK既，但唔好再多多批評（私底下你地點鬧， 就唔理啦）， 唔好再無事生事。
件事都發生到呢一步，應唔應該「佔中」已經再唔需要討論， 亦唔好再話咩搞亂香港，出少句聲，打少個人，揸少下波，其實都可以等香港回復返平靜既。
受影響既人，唔好意思！希望你地可以體諒一下，為你地發聲既人既勞苦。
無論今次成唔成功都好，我真係好衷心多謝為我地未來努力既學生們。同學們加油！
香港加油！
【圖：思念， 攝於心血來潮 出去走走既一個夜晚， 旺角】