文 : 工人一個
香港打工仔工作時數長真係出晒名！
周不時睇報紙見到唔係有工友過勞猝死，工時長而工業意外死或斷手斷腳，睇到心都實......但係個標準工時規管就等極都仲話研究中......
今日方向報呢篇[標準工時報告]報導，當堂睇到把幾火。
排名重要，定人命重要？
打工仔大事，報導少少字，仲放到去山卡啦版位幾乎睇唔到，個標題仲係「委會報告：標時或損競爭力」？！大佬呀，如果有個人話你知，你仔女去比賽，排名仲緊要過條命，你都覺得佢黐Ｘ線啦！
工人聲音完全無
成份報告都係靠估，
咁份標準工時報告又有無估下會有幾多工人受到咩程度的影響？
唔知。
即係香港有哪些行業高工時？工時去到幾長？
唔知。
方向報猛講標準工時對老細有何影響，又有冇訪問調查下真係承受住長工時的工人點睇？
一粒字都無！
得個估字都講三大段 有何居心？
成篇四段字講到標準工時咁負面，三大段由頭到尾係咁「...或...」、「...會否...」、「...可能...」，不如話「...記者／顧問斷估...」啦！
正所謂「三人成虎」，假嘢講好多次聽埋聽埋都有人會當真。方向報咁的報導手法，究竟有何居心？？？
大家做少一個鐘，人人有工開，好差咩？
評估劈頭就講個結論係「負面」。但個報導自己又話若「長工時工人每周減一小時工作，等同一萬五千七百名全職職位」。
啲野做唔曬，就要請人，依家咁多人失業和就業不足，對基層未必壞。
只不過有啲老細又唔想補水，又想人有開工無收工？咁對呢啲老細嚟講就係負面啲啦！
唉，你話方向報，仲有乜可能係基層立場的報紙吖！
[草根.行動.媒體]http://grassmediaction.wordpress.com
~~~~~~~~~~~~~~~~~~~~~~~~~~~~~~~~~~~~
方向報原文：http://orientaldaily.on.cc/cnt/news/20150123/00176_052.html