文：劉定堅
欣賞完王維基新電視台的電視劇預告片，對他的憂心一再加劇，他買了八部德國Arri Alexa攝影機拍電視劇，我對他說過應該買Sony F3便夠用，買Alexa會是浪費，果然，看預告片便出事，質量勁似一般拍電視劇的Sony900攝影機作品，請問買Alexa做乜！用Alexa機必須有專業攝影指導負責擺機位與及設計打燈，你請班揸開巴士的TVB阿叔過檔，突然叫佢地揸轟炸機，唔出事就奇。
有人會問，多馀啦，咪又係攝映機，有叉分別咩？你錯了，TVB用開的900根本不是用來拍劇的，他的景深長，遠近景物都清晰，原來製造目的是拍新聞資訊性節目；Alexa等同菲林機，景深短，容易做出電影感的層次效果，歐美是沒有人用900這些機拍電視劇的。因為900景深長，部機點鬱，畫面藝人走前走後都sharp，所以揸機容易；相反用Alexa拍劇，鬱親就out focus，又成日要換鏡頭，完全兩個概念，複雜得多了。看預告片，嚇得我心膽俱裂，剪出來的畫面大都是一般人視線水平，完全冇構圖藝術；大量用35及25鏡頭，變成長景深冇層次，等同放棄Alexa優點，當900咁用，拍得快好多，但畫面效果跌曬watt，救命！
用Alexa拍靚畫面，平均每日只拍到50-60個鏡頭，每集拍5日半，共有300個鏡頭左右，每集以44分鈡即2640秒內容計，平均每個鏡頭長近9秒，雖然有鏡頭重複用，但亦有時間極短的鏡頭，拉上補下，平均8秒一個鏡頭，唔悶到爆燈就奇。呢條係死數，神仙難變，要變唯有拍快D，即係演員做得差都唔take two，仲有就係燈打差D，部機盡量唔鬱，結果梗係畫面冇變化，悶死人啦！
王維基班革命份子用最愚蠢的另一招，只用長景深鏡頭兼唔理構圖，妖，用轟炸機速遞叉燒飯，又蠢又嘥料！一句講曬，欠藝術修養的人是不可能懂得用Alexa攝影機的，死症無得救，大家得閒買多兩手TVB股票吧！
附注：作者劉定堅三十年前創作《蝦仔爹哋》，開創盧海鵬無釐頭金句，創下處境喜劇神話記錄的劉定堅，八十年代轉戰烽火連天的港漫市場，創作了最輝煌年代的《中華英雄》，並成為極少數的代表，只憑藉創作人身份，建立個人出版企業《自由人出版集團》，創作並出版了包括《刀劍笑》、《超神Z》、《狄克戀曲》、《賭聖》等等大批經典漫畫作品；及後進軍小說市場，《刀劍笑新傳》開創了周刋武俠小說神話，憑逾百部作品打開了中、港、台三地市場，經過長時間投入電影及動畫創作及製作，年多前開始進軍國內影視市場，身兼編劇、導演、製作人及投資者四合一身份，繼續挑戰更複雜的龐大市場，延展創作生命。