依家我哋幾個重要分歧需要解決：
- 有人覺得需要有大台領導，有人覺得唔需要大台，自己代表自己。
- 有人覺得集中守一兩個重要嘅地方，例如金鐘，容易集合力量。另外啲人就覺得，戰線越多，籌碼越多，戰線只能多不能少。
- 有唔同陣營嘅人互相叫陣。既領功又互相詆毀排斥。浪費好多寶貴時間，同時打擊我哋嘅士氣。
其實解決辦法好簡單，原則就係：
- 靈活運用策略。需要時有大台，不需要時就自己代表自己。市民有責任給大台意見，大台有責任收集分析市民意見。
- 平日人少守住主要戰略通道，但係，佔領據點旺角金鐘銅鑼灣，一個都不能少！
- 懇請左右派不要再爭鬥，以停止內耗。
分析如下：
1. 有大台定無大台？
想要大台嘅人希望有人領導呢場運動。有一個代表同政府談判，將我哋數以十萬計市民嘅團結力量發揮出來。
唔想要有大台嘅人，唔想被人代表。佢地擔憂，大會代表會呼籲市民散水。同時佢地覺得，無代表嘅話，市民就會自動自覺保衛戰線，各自發揮佢嘅最大嘅力量。
佢地兩方都有道理，應該取兩家之長，就係：平時我地自己代表自己，自動自覺互相補位，各自發揮自己最大的力量。
但必要時，例如同政府對話談判，就需要有代表。代表可由學聯主導，學民、佔中和學者輔導，但必須諮詢民意。依家好多人不滿，就係因為學聯宣佈策略嘅時候就咁就係網上宣佈，感覺似乎無問過大家意見，惹來「邊個授權」嘅疑問。建議可在公民廣場和網上同時諮詢市民，時間可以短至一兩個鐘（大部分市民都係時時留意動態，一兩個鐘不會拖太久，失了速度。）諮詢時肯定會有親政府人士踩場灌水，但係諮詢俾市民一個參與機會及心理準備，擴大民意基礎。至於最終策略，就要由學聯等人以智慧分析和決定。（辛苦了！）
2. 守重要據點，定係守多個據點？
主張只守重要據點嘅人，覺得我哋人手唔夠，尤其是星期一至五、凌晨三點至下午二點嘅時候。守多個據點拉長戰線，為堅守嘅人，尤其是學生，帶來很大壓力。因為佢哋要係人少嘅時候守護鐵馬，使其不被清拆。同時，長戰線影響民生較大，容易被反佔中人士抹黑，令我哋係輿論戰上比較輸蝕。
主張守長戰線嘅人，覺得戰線係籌碼。戰線越短，籌碼就越少。同時佢地懷疑，所有建議收窄戰線的人，都在暗地裡叫散水。所以佢地對收窄戰線異常敏感，堅持固守所有佔領的道路。
解決辦法亦好簡單，但首先要明白據點（或佔領區）同戰線 ，係兩回事。據點就係金鐘、旺角、銅鑼灣 ，戰線就係各據點上佔領的道路。本文建議星期一至五守住重要戰線，例如金鐘夏慤道、旺角彌敦道、銅鑼灣怡和街同Sogo外面。戰略上唔需要嘅路段，例如金鐘嘅金鐘道（只是例子），可以考慮不守。因為平日少人守咁多條街很困難，義工義士走來走去會疲於奔命，黑社會愛字頭來的時候亦會增加佢哋嘅危險。反正有甚麼急需如林鄭吹雞的時候，十幾二十萬人可以即刻出來，戰略上唔需要嘅路段自然會再次佈滿人，不用固守。這樣我們戰略可以靈活運用，平時守重地，有事時就自動擴大領區。唯一缺點係擴大領區時要搬鐵馬，但這個代價遠低於分薄人手或失去據點，尚可接受。
怎樣決定那些道路應該守、那些道路可以考慮不守？有兩個考慮重點：第一防線係唔係保護平日留守嘅市民？係，就應該守。第二防線係咪在戰略上能夠保護另外一啲需要堅守嘅防線？例如旺角長長的彌敦道，防線係一個接一個互相保護，就應該保留。相反，金鐘道嘅防線，同金鐘嘅主要佔領地有一段距離，防守不已，令義工疲於奔命，就可以考慮撒除。這兩個只是例子，可以商榷，重點係策略上嘅考慮。
相比起防線，據點就絕對一個都不能少！而且旺角銅鑼灣金鐘同樣重要，唔好再搞金鐘旺角嘅分化。據點分三個不同區域，實際係互相保護，讓試圖破壞的人分身不暇、疲於奔命，所以每一個都一定要堅守！
3. 左右陣營邊個啱？
兩個都唔啱。因為內鬥會造成內耗，對整個雨傘革命無益無建設性，曲線幫了對手。
防止散水係好重要，但係手段唔係目的。有人立場飄忽不定，可能暗地裡叫人散水？提出反對意見，並提出你的理據就好。明白提醒市民小心某些人的言行係為大家好，但係運動唔需要分黨分派、有你無我、或唯我獨尊。市民的眼睛耳朵係雪亮嘅，好快就分得出邊個有理邊個膠噏，實在無需要喊打喊殺，大搞witch hunt，令到草木皆兵，耗損大家嘅精神體力。
同時，對某人講嘅說話無論對錯都奉若神詔，或者對另外一啲人講嘅說話無論對錯都反對，個人認為十分不智。其實任何人講的話做的事對運動有益，都應該支持；這樣便能爭取臥底幫我地做事，同時不會殺錯良民。相反，任何人言行不合理或對運動無益處，都認予禮貌勸止；這樣便能防止政客抽水，同時嚴防卧底滲透。
另外，領功的行為（誰人吹雞誰人堅守誰人打甚麼江山），都係損人利己兼無建設性。雨傘革命係全部人嘅功勞。就算係黃之鋒同學聯，功勞都唔會大過其他市民。罷課的學生，出來支持子女的父母，網上的鍵盤戰士，街頭留守的義工義士，功勞相等。任何人提出的建議，只要有理，都有可能被接納而左右大局；相反冇一個人有所有答案，除非馬後炮。運動嘅成功，重點係分權（decentralization of power），而不是集權。
結語：只要我哋靈活運用戰術，以大局着眼，屏棄私利和派系鬥爭，團結而不自我分化，就可以互相走位互補長短，齊心一致的發揮我們最大潛力，早日達成我哋嘅唯一目標：公民提名真普選。
歡迎意見，同意請廣傳。