居屋已經再破1000萬，大家應該覺得好神奇既係，點解一間公營房屋最後都可以炒到咁貴，其實唔係冇得解：
1. 公營房屋同私樓個市場啲樓既質素明顯差距太大，地產商起啲市區納米樓都要成1 000萬，同樣定到成千萬買到間3房700呎市區居屋分分鐘有埋海景，俾咁大舊錢你會揀垃圾定正常野？
2. 舊時居屋一開始出台由有十年轉售限制，頭5年只可以原價賣番俾政府，過左10年先可以補地價流出市場，其實係好好隔絕到自住既人同炒家。咁多年來一路開俾啲人炒賣，依家第3年就可以「白居二」，白表人士收入上限佔左全港75%，過5年就可以補地價，令居屋有價有市，炒到去1000萬又有幾難？
3. 政府喺個過程其實名義上好似「幫人置業」，但係今次1000萬個居屋盤係透過補地價方式賣出既，即係話政府唔駛做任何野，就可以淨袋300幾萬。一年有成差唔多成千宗補地價居屋流失去私人市場，成大舊錢億億聲又係去左基本工程基金俾政府起大白象工程。你估政府又會唔會想將居屋留番俾真係有需要買居屋既人，定係炒家入場都唔介意？
託政府既房屋政策所致，其實依家個房屋市場已經相當扭曲，依家52折新居屋去到$6000-$7000呎，二手居屋今年我地計過可以去到中位數$8300呎，根本係土地資源分配失衡同冇分炒家用家所致。依家啲真心想買樓既人已經唔mind供20年樓自住，將居屋個轉讓限制set到20年先俾佢放出私人市場炒，20年內只可以原價俾政府回購，其實係其中一個辦法隔走啲爭樓買既投資者。